36.69 శాతమే హాజరు

పరింపూడి ప్రాథమిక పాఠశాలకు హాజరైన ఒకే ఒక విద్యార్థి

ఏలూరు విద్యా విభాగం, న్యూస్‌టుడే: సంక్రాంతి సెలవుల అనంతరం తొలిరోజు 36.69 శాతం మంది విద్యార్థులు మాత్రమే పాఠశాలలకు హాజరయ్యారు. జిల్లాలోని ప్రభుత్వ బడుల్లో మొత్తం 3,28,334 మంది చదువుతున్నారు. సాధారణ రోజుల్లో సుమారు 2.80 లక్షల మంది హాజరవుతుంటారు. సంక్రాంతి సెలవులు ముగియడంతో సోమవారం పాఠశాలలు పునఃప్రారంభమయ్యాయి. బంధువుల ఇళ్లకు వెళ్లడంతో కొంతమంది హాజరు కాలేకపోయారు. మరోవైపు కొవిడ్‌ మూడో దశ హెచ్చరికల నేపథ్యంలో మరికొంతమంది రాలేదు. సోమవారం జిల్లా వ్యాప్తంగా ప్రభుత్వ బడులకు 1,17,193 మంది మాత్రమే హాజరయ్యారు. ఇందులో 1,08,129 మంది మధ్యాహ్న భోజనం చేశారు.