భక్తి, ప్రేమ, త్యాగాల.. సమ్మిళతమే రంజాన్‌...

నేటి నుంచి ఉపవాస నెల ప్రారంభం  
పవిత్ర మాస ప్రార్థనలకు ఏర్పాట్లు

ఆగిరిపల్లిలో సిద్ధమైన మసీదు

ఆగిరిపల్లి, న్యూస్‌టుడే : అందరూ కలిసి మెలిసి ఉండాలి. కష్టం వచ్చినప్పుడు పొరుగు వారిని ఆదుకోవాలన్నదే సర్వమతాల సారాంశం. భక్తి, ప్రేమ, త్యాగాల.. సమ్మిళతమే రంజాన్‌. ప్రపంచ వ్యాప్తంగా ముస్లిం సోదరులు నిర్వహించుకునే అతి పెద్ద పండగ ఇది. ఆ పవిత్ర మాస శుభఘడియలు రానే వచ్చాయి. నెలవంక దర్శనంతో ప్రారంభం కానుంది. ఈ నేపథ్యంలో ప్రార్థనలకు ఏర్పాట్లు పూర్తయ్యాయి. పలు మసీదులను విద్యుత్తు దీపాలతో అలంకరించారు.

ప్రాథమిక విధులకు ప్రాధాన్యం

ప్రతి ముస్లిం ఐదు ప్రాథమిక విధుల ద్వారా ముందుకు పయనిస్తారు. కలిమా చదవడం, రోజూ ఐదు సార్లు నమాజ్‌ చేయడం, రంజాన్‌ నెలలో ఉపవాసం, తాను సంపాదించిన దాంట్లో కొంత భాగం దానం చేయడం(జకాత్‌), హజ్‌ చేయడం. వీటిల్లో అత్యంత ప్రాధాన్యం ఉన్న ఉపవాసాల నెలే రంజాన్‌. నెల రోజుల ఉపవాస దీక్షతో శరీరాన్ని శుష్కింపజేయడం ద్వారా ఆత్మ ప్రక్షాళన అవుతుందన్నది వారి విశ్వాసం.

అందరి విధి

పవిత్ర ఖురాన్‌ ప్రకారం ప్రతి ముస్లిం రంజాన్‌ నెలలో ఉపావసం ఉండటం విధి. దీన్ని పిల్లల నుంచి పెద్దల వరకు తప్పనిసరిగా పాటించాలి. అనారోగ్యంతో బాధపడే వారు, బాలింతలు, గర్భిణులకు మినహాయింపు ఉంటుంది. అయితే వారు తమ సమస్యలు తీరాక ఖజా ఉపవాసాలు ఉండాలి.

ఆధ్యాత్మిక జీవన విధానంపై శిక్షణ

ఉపవాసం సందర్భంగా శరీరం, మనసును పవిత్రంగా ఉంచుకొని ఉదయం సూర్యోదయం లోపు,  సూర్యాస్తమయం తరువాత మాత్రమే ఆహారం తీసుకోవడం ప్రధాన విషయం. ఉపవాసం ఆచరిస్తున్న సమయంలో అసత్యం పలకరాదు, అధర్మంగా ప్రవర్తించరాదు. తద్వారా దైవంపై ప్రేమ అధికమవుతుంది. తదుపరి జీవితానికి ఈ నెల ఒక ‘శిక్షణ’గా ఉపయోగపడుతుంది. రంజాన్‌ నెల ప్రధాన ధ్యేయం ఇదే.

జకాత్‌, ఫిత్రా తప్పనిసరి

దానం చేయగలిగిన స్థితిలో ఉన్న ప్రతి ముస్లిం తన మిగులు సంపాదనలో కొంత పేదలకు పంచిపెట్టడమే జకాత్‌. ధన వ్యామోహాన్ని దూరం చేయడం, పేదవారు కూడా పండుగను సంతోషంగా చేసుకోవడానికే అల్లాహ్‌ జకాత్‌ను తప్పనిసరి చేశారు. ఇది ఏటా కొనసాగాలి. అదే విధంగా అప్పుడే పుట్టిన బిడ్డతో సహా అందరూ ఫిత్రాను పేదవారికి ఇవ్వాలి.

ఎతికాఫ్‌..

రంజాన్‌ నెలలో మరో పవిత్ర అంశం ఎతికాఫ్‌. ఈ నెలలో చివరి పది రోజులు కుటుంబాన్ని తాత్కాలికంగా వదిలి మసీదుల్లో దైవ ప్రార్థనలతో గడపటమే. అతి పవిత్రమైన లైలతుల్‌ ఖద్ర్‌ ఈనెలలోనే వస్తుంది. ఈ మాసంలోనే 27వ రోజు రాత్రిని పుణ్యరాత్రిగా పరిగణిస్తారు. ఆ రాత్రి జాగారం ఉండి దైవ ప్రార్థనలతో గడుపుతారు. నెల రోజుల పాటు చదివిన ఖురాన్‌ చివరి అంకాన్ని ఆ రాత్రి ముగిస్తారు. అల్లాహ్‌ కృప కోసం ప్రత్యేకంగా దువా చేస్తారు.