ఎర్రచందనం దుంగలు స్వాధీనం

కారు, దుంగలతో పాటు నిందితుడిని చూపుతున్న డీఎస్పీ నాగరాజు

ముద్దనూరు, న్యూస్‌టుడే: కడప-తాడిపత్రి ప్రధాన రహదారిలోని ముద్దనూరు మండలం తిమ్మాపురం గ్రామ సమీపంలో ఓ కారులో అక్రమంగా తరలిస్తున్న ఎర్రచందనం దుంగలను స్వాధీనం చేసుకున్నట్లు జమ్మలమడుగు డీఎస్పీ నాగరాజు గురువారం తెలిపారు. ముద్దనూరు ఠాణాలో ఆయన విలేకరుల సమావేశంలో మాట్లాడుతూ జిల్లా ఎస్పీ అన్బురాజన్‌ ఆదేశాల మేరకు.. సీఐ నరేష్‌కుమార్‌ ఆధ్వర్యంలో తిమ్మాపురం గ్రామ సచివాలయం వద్ద  వాహనాల తనిఖీ నిర్వహిస్తుండగా ఓ కారులో 11 ఎర్రచందనం దుంగలను గుర్తించామన్నారు. దుంగలను తరలిస్తున్న కారును, రెండు గొడ్డళ్లను, రెండు పట్టుడు సైజు కలిగిన కంకర రాళ్లను స్వాధీనం చేసుకున్నట్లు తెలిపారు. ఎర్రచందనం అక్రమ రవాణాకు పాల్పడిన నిందితుల్లో  మైదుకూరు మండలం సోమయాజులపల్లె గ్రామానికి చెందిన నాగార్జునను అదుపులోకి తీసుకోగా, అన్నమయ్య జిల్లా మదనపల్లెకు చెందిన కుమార్‌, హరి తప్పించుకున్నట్లు తెలిపారు. వారి కోసం గాలిస్తున్నట్లు చెప్పారు.