రాష్ట్రం అభివృద్థి పథంలో  ముందుకెళ్లాలనేది నా పెద్ద కోరిక
అందుకు మీరంతా నడుం బిగించి.. ఆశీస్సులందించండి
అభిమానులకు చిరంజీవి పిలుపు

ఈనాడు, అమరావతి: ఆంధ్రప్రదేశ్‌లో జనసేన అధినేత పవన్‌కల్యాణ్‌, తెదేపా అధినేత చంద్రబాబు, భాజపా కలిసి కూటమిగా ఏర్పడటాన్ని సినీనటుడు చిరంజీవి స్వాగతించారు. ‘ఇది మంచి పరిణామం.. చాలా సంతోషం. చాలా కాలం తర్వాత ఇప్పుడే రాజకీయాలపై మాట్లాడుతున్నా.. దానికి ప్రధాన కారణం తమ్ముడు పవన్‌ కల్యాణ్‌’ అని చిరంజీవి పేర్కొన్నారు.

‘ఆంధ్రప్రదేశ్‌ అభివృద్ధి పథంలో ముందుకు వెళ్లాలనేది నాకున్న పెద్ద కోరిక.. అందుకు మీరంతా నడుం బిగించండి.. మీరంతా ఇలాంటి వారికి (ఎన్‌డీఏ అభ్యర్థులు సీఎం రమేశ్‌, పంచకర్ల రమేశ్‌ను చూపిస్తూ) ఓటేయండి.. మీ ఆశీస్సులు వారికి ఉన్నాయనే భావాన్ని, నమ్మకాన్ని మాకు కలిగించండి’ అని అభిమానులకు పిలుపునిచ్చారు. అనకాపల్లి నుంచి భాజపా తరఫున లోక్‌సభ అభ్యర్థిగా పోటీ చేస్తున్న సీఎం రమేశ్‌, పెందుర్తి అసెంబ్లీ స్థానం నుంచి జనసేన అభ్యర్థిగా పోటీ చేస్తున్న పంచకర్ల రమేశ్‌ శనివారం హైదరాబాద్‌లోని చిరంజీవిని ఆయన నివాసంలో కలిశారు. ఈ సందర్భంగా ఆయన వారిద్దరిని గెలిపించాలని కోరుతూ వీడియో విడుదల చేశారు. ‘సీఎం రమేశ్‌ నా చిరకాల మిత్రుడు.., పంచకర్ల రమేశ్‌ నా ఆశీస్సులతో రాజకీయంగా అరంగేట్రం చేశారు. ఇద్దరూ నాకు కావాల్సినవారే.. ఇద్దరూ చాలా మంచివారే కాదు. చాలా సమర్థులు.. వారిని గెలిపించండి. నియోజకవర్గ అభివృద్ధికి ఎంతో దోహదపడతారనే నమ్మకం ఉంది’ అని చిరంజీవి చెప్పారు. ‘నేను ఎప్పటి నుంచో సీఎం రమేశ్‌ గురించి వింటున్నా.. చూస్తున్నా. ఆయనకు కేంద్రంతో ఉన్న సత్‌సంబంధాలు, పరిచయాలు అనకాపల్లి లోక్‌సభ నియోజకవర్గ అభివృద్ధికి ఎంతో ఉపయోగపడతాయి’ అని పేర్కొన్నారు.