Electric scooters: కంటెయినర్‌లో మంటలు.. కాలిబూడిదైన 20ఎలక్ట్రిక్‌ స్కూటర్లు!

మహారాష్ట్రలోని నాసిక్‌లో ఎలక్ట్రిక్‌ వాహనాలు తరలిస్తున్న భారీ కంటెయినర్‌లో మంటలు చెలరేగాయి. ఈ ఘటనలో 20 ఎలక్ట్రిక్‌ స్కూటర్లు అగ్నికి ఆహుతయ్యాయి.

Published : 13 Apr 2022 01:32 IST

నాసిక్‌: మహారాష్ట్రలోని నాసిక్‌లో ఎలక్ట్రిక్‌ వాహనాలు తరలిస్తున్న భారీ కంటెయినర్‌లో మంటలు చెలరేగాయి. ఈ ఘటనలో 20 ఎలక్ట్రిక్‌ స్కూటర్లు అగ్నికి ఆహుతయ్యాయి. నాసిక్‌లోని ద్విచక్ర వాహనాల తయారీ సంస్థ జితేంద్ర న్యూ ఈవీ టెక్‌  కంపెనీ ఫ్యాక్టరీ గేటుకు సమీపంలోనే ఈ ఘటన చోటుచేసుకుంది. జితేంద్ర ఎలక్ట్రికల్‌ స్కూటర్లను బెంగళూరుకు తరలిస్తుండగా మంటలు చెలరేగాయి. మొత్తం 40 స్కూటర్లతో వెళ్తున్న ఈ వాహనంలో మంటలు చెలరేగడంతో వాహనాలు భారీగా ధ్వంసమయ్యాయి. గత మూడు వారాల వ్యవధిలో ఎలక్ట్రిక్‌ ద్విచక్రవాహనాలకు మంటలు అంటుకున్న ఘటనల్లో ఇది ఐదోది కావడం గమనార్హం. మార్చి 26న పుణెలో ఓలా ఎస్‌1 ప్రో ఎలక్ట్రికల్‌ స్కూటర్‌ మంటల్లో కాలిపోగా.. అదేరోజు తమిళనాడులోని వెల్లూరులో ఒకినావా ఎలకట్రిక్‌ స్కూటర్‌కు మంటలు అంటుకున్నాయి. అలాగే, మార్చి 28న తిరుచ్చిలో ఇలాంటి ఘటనే చెలరేగగా.. ఆ మరుసటి రోజు చెన్నైలో నాలుగో ఘటన చోటుచేసుకుంది. 

మరోవైపు, ఏప్రిల్‌ 9న జరిగిన ఈ ఘటనపై విచారణ చేపట్టినట్టు జితేంద్ర న్యూ ఈవీ టెక్‌ కంపెనీ తెలిపింది. దీనికి మూలకారణమేంటో తెలుసుకొని.. త్వరలో చెబుతామని ఆ సంస్థ అధికార ప్రతినిధి ఓ ప్రకటనలో తెలిపారు.  మరోవైపు, ఎలక్ట్రికల్‌ స్కూటర్లకు మంటలు అంటుకుంటున్న ఘటనలు పెరుగుతున్న వేళ కేంద్రం దర్యాప్తునకు ఆదేశించింది. ఎలక్ట్రిక్ స్కూటర్లలో ఉపయోగించే బ్యాటరీలు, సంబంధిత అంశాల్లో నాణ్యతే ఈ ఘటనలకు కారణమని పలువురు నిపుణులు పేర్కొంటున్నారు.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని