బయటికెళ్తే మాస్క్‌ తప్పనిసరి: సీడీసీ

ఇంటర్నెట్‌ డెస్క్‌: అమెరికాలో కొవిడ్‌-19 మహమ్మారి ప్రభావం అంతకంతకూ పెరుగుతుండటంతో ఆ దేశ అంటు వ్యాధుల నియంత్రణ సంస్థ(సీడీసీ) పలు సూచనలు చేసింది. అమెరికన్లు బయటికెళ్లినప్పుడు కచ్చితంగా మాస్కు ధరించాలని స్పష్టం చేసింది. ఇంట్లో ఎవరైనా వ్యక్తులు కొవిడ్‌ బారిన పడితే మిగతా వాళ్లూ మాస్కులు వేసుకోవాలని పేర్కొంది. అమెరికాలో కరోనా వైరస్‌ మహమ్మారి కారణంగా రోజురోజుకూ మరణాల రేటు పెరుగుతున్న క్రమంలో సీడీసీ ఈ సూచనలు చేయడం గమనార్హం. 

సీడీసీ వెల్లడించిన ప్రకారం.. ‘అంటువ్యాధులు చాలా వరకు లక్షణాలు లేని వ్యక్తుల ద్వారానే ఒకరి నుంచి మరొకరికి సంక్రమిస్తున్నాయి. అలాంటి వ్యాధుల్ని దరిచేరనీయకుండా మాస్కులు కీలక పాత్ర పోషిస్తాయి. వ్యక్తులు ఎవరైనా కరోనా బారిన పడిన వారితో కలిసి ఇంట్లో ఉండాల్సి వచ్చినపుడు మాస్కు తప్పనిసరిగా వినియోగించాలి. కొనుగోలు చేయలేకపోతున్న వారికోసం ప్రభుత్వం మాస్కుల పంపిణీ చేస్తుంది. ఆరోగ్య సంరక్షణ కార్మికులు, ఇతర ఫ్రంట్‌ లైన్‌ వర్కర్స్‌ కోసం మల్టీలేయర్‌ క్లాత్‌ మాస్కులు లేదా నాన్‌ మెడికల్‌ డిస్పోజబుల్‌ మాస్కులను పంపిణీ చేయనున్నాం’ అని సీడీసీ సిఫారసు చేసింది. కాగా అమెరికాలో ఇప్పటి వరకు 1.40కోట్ల కరోనా కేసులు నమోదు కాగా.. 2.70లక్షల మంది మహమ్మారి కారణంగా మరణించారు. 

ఇదీ చదవండి

24 గంటల్లోనే కరోనా వ్యాప్తికి అడ్డుకట్ట