Ashok Gehlot: అసెంబ్లీలో పాత బడ్జెట్ చదివిన రాజస్థాన్ సీఎం..!

జైపుర్‌: రాజస్థాన్‌(Rajasthan ) ముఖ్యమంత్రి అశోక్‌ గహ్లోత్‌(Ashok Gehlot) ప్రవేశపెట్టిన బడ్జెట్‌ అసెంబ్లీలో గందరగోళానికి దారితీసింది. ఆయన గతేడాది పద్దులోని విషయాలనే ఈ సారి కూడా చదవడంతో ఈ పరిస్థితి ఎదురైంది. దాదాపు ఎనిమిది నిమిషాల పాటు ఆయన గత ఆర్థిక సంవత్సరానికి చెందిన గణాంకాలనే చదివారు. కాంగ్రెస్ మంత్రి ఒకరు ఈ తప్పిదాన్ని గుర్తించి ప్రసంగాన్ని ఆపించారు. 

సీఎం అశోక్ గహ్లోత్‌(Ashok Gehlot) వద్దే  ఆ రాష్ట్ర ఆర్థిక శాఖ కూడా ఉంది. ఈ క్రమంలో శుక్రవారం ఆయనే అసెంబ్లీలో బడ్జెట్‌ను ప్రవేశపెట్టారు. ఈ ప్రతులను చదవడం ప్రారంభించిన ఆయన.. పాత పథకాలు, గత ఏడాది అమలు చేసిన పట్టణాభివృద్ధి ప్రణాళికలను ప్రస్తావించారు. కాంగ్రెస్ మంత్రి మహేశ్‌ జోషి ఈ విషయాన్ని గుర్తించి, సీఎంకు తెలియజేశారు. ఈ పరిణామంతో భాజపా సభ్యులు తీవ్ర నిరసన వ్యక్తం చేశారు. కొత్త పద్దులోని విషయాలు లీక్ అయ్యాయా..? అని నిలదీశారు. దీంతో సభా కార్యకలాపాలకు అంతరాయం కలిగింది. ‘ఎనిమిది నిమిషాల పాటు సీఎం పాత బడ్జెట్‌ను చదివారు. ఇలా జరగడం చరిత్రలో ఇదే తొలిసారి కావొచ్చు. నేను సీఎంగా ఉన్నప్పుడు.. ఒకటికిరెండుసార్లు ప్రతులను పరిశీలించుకునేదాన్ని. ఇలా పాత బడ్జెట్‌ను చదివేవారి చేతిలో రాష్ట్రం ఎంత సురక్షితంగా ఉంటుందో మీరే ఊహించుకోగలరు’ అని మాజీ సీఎం వసుంధరా రాజే విమర్శించారు. ఇది ప్రజాస్వామ్యాన్ని అవమానించడమే అవుతుందని, గహ్లోత్ క్షమాపణలు చెప్పాలని కమలం పార్టీ నేతలు డిమాండ్‌ చేశారు. 

దీనిపై ఆయన ట్విటర్ వేదికగా స్పందించారు. ‘నేను  చదువుతున్న ప్రతులకు, మీ చేతిలో ఉన్న ప్రతుల్లోని అంశాలకు తేడా ఉంటే మీరు లేవనెత్తాలి. ఆ పాత పత్రాలను చూసుకునేందుకు తెచ్చాను. ఇక్కడ ఎలాంటి లీక్‌ జరగలేదు. భాజపా(BJP) తన చెత్త రాజకీయాలకు బడ్జెట్‌ను కూడా వదిలిపెట్టదని దీన్నిబట్టి తెలుస్తోంది. రాజస్థాన్‌ అభివృద్ధికి ఒకేఒక్క అవాంతరం భాజపా మాత్రమే’ అని తనపై వచ్చిన విమర్శలను తిప్పికొట్టారు. నిరసనల అనంతరం కార్యకలాపాలు తిరిగి ప్రారంభమ్యాయి.