చైనా  పర్యాటకులకు ఈ-వీసాలు రద్దు

భారత రాయబార కార్యాలయం తాత్కాలిక నిర్ణయం

బీజింగ్‌: చైనాలో విజృంభిస్తున్న కరోనా వైరస్‌ ప్రపంచ దేశాలనూ వణికిస్తోంది. ఈ నేపథ్యంలో చైనా నుంచి భారత్‌కు వచ్చే ప్రయాణికుల విషయంలో బీజింగ్‌లోని భారత రాయబార కార్యాలయం మరింత అప్రమత్తతో వ్యవహరిస్తోంది. ఇందులో భాగంగా తాత్కాలికంగా ఆన్‌లైన్‌ వీసాలను రద్దు చేస్తున్నట్టు ఆదివారం ప్రకటించింది. ఈ ప్రాణాంతక మహమ్మారి సృష్టించిన కల్లోలానికి ఇప్పటికే  300 మందికి పైగా ప్రాణాలు కోల్పోయిన విషయం తెలిసిందే. 14,562 మంది ఈ వైరస్‌కు ప్రభావితమయ్యారు. ప్రస్తుతం ఈ వైరస్‌ భారత్‌, అమెరికా, యూకేతో పాటు మొత్తం 25 దేశాలకు విస్తరించింది. 

చైనాలో నెలకొన్న ప్రస్తుత పరిణామాల నేపథ్యంలో భారత్‌ వెళ్లేందుకు ఈ-వీసాల మంజూరును తాత్కాలికంగా రద్దు చేస్తున్నట్టు చైనాలోని భారత రాయబార కార్యాలయం వెల్లడించింది. చైనా పాస్‌పోర్టులు కలిగి ఉన్నవారితో పాటు చైనాలో నివసిస్తున్న విదేశీయులకూ ఇది వర్తిస్తుందని తెలిపింది. ఇప్పటికే ఈ -వీసాలు జారిచేసిన వారికి కూడా అవి చెల్లవంటూ సమాచారం అందించినట్టు ప్రకటనలో పేర్కొంది.  ఎవరైనా కచ్చితంగా భారత్‌కు వెళ్లాల్సి ఉంటే మాత్రం అందుకు తగిన కారణాలతో భారత రాయబార కార్యాలయాన్ని సంప్రదించవచ్చని సూచించింది.

ఇదీ చదవండి..