కొవిడ్‌-19పై పోరుకు విదేశీ విరాళాలు?

దిల్లీ: కరోనా మహమ్మారిపై పోరుకు మోదీ ప్రభుత్వం విదేశీ విరాళాలు స్వీకరించేందుకు సుముఖంగా ఉన్నట్లు తెలుస్తోంది. దేశంలో వైరస్‌ తీవ్రత అంతకంతకూ పెరుగుతున్న నేపథ్యంలో ఈ నిర్ణయం తీసుకున్నట్లు సమాచారం. కొవిడ్‌-19పై పోరుకు ఏర్పాటైన పీఎం-కేర్స్‌కు వచ్చే విదేశీ విరాళాలను స్వాగతించేందుకు సిద్ధమైనట్లు విశ్వసనీయ వర్గాలు తెలిపాయి. 

కొవిడ్‌పై పోరుకు అవసరమయయ్యే వెంటిలేటర్లు, ఎన్‌95 మాస్కులు, 3 లేయర్ల మాస్కులు వంటివి అందించాలని వివిధ దేశాల్లోని భారత రాయబారులు ఆయా దేశాలను కోరుతున్నారు. వ్యాక్సిన్లు కూడా అందించాలని కోరినట్లు సమాచారం. మరోవైపు దేశంలో కరోనా పాజిటివ్‌ కేసుల సంఖ్య 1400 దాటగా..38 మంది మరణించారు.