Leopard: కాలేజీ క్యాంపస్‌లో చిరుత సంచారం.. స్థానికుల్లో భయం.. భయం!

కోయంబత్తూరు: తమిళనాడులోని కోయంబత్తూరులో ఓ చిరుత పులి కాలేజీ క్యాంపస్‌లో సంచరించడం కలకలం రేపుతోంది. అక్కడి స్థానికులు తీవ్ర భయాందోళనలకు గురవుతున్నారు. బుధవారం తెల్లవారుజామున చిరుతపులి ఆ ప్రాంతాన్ని వీడి వెళ్లే ముందు ఓ కుక్కపై దాడిచేసి చంపేసింది.  కాలేజీ వాచ్‌మెన్‌ ఆ మృతదేహాన్ని గుర్తించి అటవీశాఖ అధికారులకు సమాచారం అందించారు. అక్కడికి వచ్చిన అటవీశాఖ అధికారులు తనిఖీలు చేపట్టి గత కొన్ని నెలలుగా చిరుత అక్కడ సంచరించినట్టుగా ఆనవాళ్లు గుర్తించినట్టుగా స్థానికులు చెప్పారని పోలీసులు వెల్లడించారు. అయితే, అదృష్టవశాత్తు పండుగ సీజన్‌ నేపథ్యంలో కళాశాలకు సెలవులు కావడంతో అక్కడ ఎవరూలేరన్నారు. మడుక్కరై అడవులకు సమీపంలో ఉన్న ఈ ప్రాంతంలో చిరుత సంచారంపై ఇప్పటికే గ్రామస్థులు అటవీశాఖకు సమాచారం ఇచ్చారనీ.. కొన్ని రోజుల క్రితం దాని కదలికలపై వీడియోను కూడా అందజేశారన్నారు. ఈ చిరుత జనావాసాల్లోకి ప్రవేశించకుండా తగిన చర్యలు తీసుకుంటామని అటవీశాఖ అధికారులు హామీ ఇచ్చారని పోలీసులు తెలిపారు.

► Read latest National - International News and Telugu News