US: క్యాపిటల్‌ భవనానికి భద్రత కొనసాగింపు

వాషింగ్టన్‌: అమెరికా క్యాపిటల్‌ భవనంపై దాడులకు అవకాశం ఉందన్న వార్తల నేపథ్యంలో మరో రెండు నెలల పాటు జాతీయ భద్రతా దళాన్ని అక్కడే మోహరించి ఉంచాలని పెంటగాన్‌ నిర్ణయించింది. అమెరికా రక్షణ మంత్రి అయాడ్‌ ఆస్టిన్ ఈ విషయాన్ని వెల్లడించారు. ప్రస్తుతం 2300 మంది నేషనల్‌ గార్డులు క్యాపిటల్‌ బిల్డింగ్‌ వద్ద విధుల్లో ఉండగా, క్యాపిటల్‌ పోలీసుల విజ్ఞప్తి మేరకు వారిని మే 23 వరకు కొనసాగించనున్నట్లు ఆస్టిన్‌ పేర్కొన్నారు. వాషింగ్టన్‌ మొత్తంమీద ప్రస్తుతం 5,100 మంది నేషనల్‌ గార్డులు ఉన్నారు. వారికి అప్పగించిన విధుల గడువు మార్చి 12తో ముగియనుంది. తాజాగా ఆ గడువును మే 23 వరకు పొడిగించారు. రెండు నెలల క్రితం క్యాపిటల్‌ బిల్డింగ్‌పై ట్రంప్‌ మద్ధతుదారులు దాడి చేసి విధ్వంసం సృష్టించారు. అప్పటినుంచి క్యాపిటల్‌తోపాటు వాషింగ్టన్‌లో నేషనల్‌ గార్డులను మోహరించారు.