Sabarimala: వచ్చే వారంలో తెరుచుకోనున్న శబరిమల.. యాత్రికులకు నిబంధనలివే..!

తిరువనంతపురం: మండల మకరవిళక్కు పండగ సీజన్​ సందర్భంగా శబరిమల ఆలయం వచ్చే వారం తెరుచుకోనుంది. ఈ 16వ తేదీన నుంచి రెండు నెలల పాటు వర్చువల్​ క్యూ విధానంలో రోజుకు 30వేల మంది భక్తులకు అనుమతించనున్నారు. 15వ తేదీ సాయంత్రం 5 గంటలకు ప్రధాన అర్చకుడు కందరారు మహేశ్​ సమక్షంలో మరో అర్చకుడు వీకే జయరాజ్​ ఆలయ గర్భగుడిని తెరుస్తారు. అయ్యప్పస్వామి ఆలయం, మల్లికాపురం ఆలయాలకు కొత్తగా ఎంపిక చేసిన అర్చుకులను అధికారికంగా నియమించే ప్రక్రియ అదే రోజు రాత్రి జరగనుంది. 16వ తేదీ నుంచి భక్తులకు అనుమతినిస్తారు. డిసెంబర్​ 26న మండలపూజ ముగుస్తుంది. డిసెంబర్​ 30న మకరవిళక్కు కోసం ఆలయాన్ని తెరుస్తారు. 2022 జనవరి 14న మకర జ్యోతి దర్శనం ఉంటుంది. అదే నెల 20న ఆలయాన్ని మూసివేయనున్నారు. కరోనా వైరస్‌ నేపథ్యంలో కఠినమైన నిబంధనలు అమల్లో ఉంటాయని అధికారులు తెలిపారు.

మార్గదర్శకాలు ఇవే..

* కొవిడ్‌ టీకా రెండు డోసులు తీసుకున్నవారు అధికారులకు ఆ​ సర్టిఫికెట్​ చూపించాలి. లేకపోతే శబరిమలను సందర్శించుకునే 72 గంటల ముందు ఆర్​టీపీసీఆర్​ పరీక్ష చేసుకోవాలి. ఆ నెగిటివ్​ రిపోర్టును అధికారులకు సమర్పించాలి.

* దీర్ఘకాలిక వ్యాధులతో బాధపడుతున్నవారు ఆరోగ్య పరీక్షలు చేయించుకుని ఆలయానికి రావాలి.

* ప్రతి ఒక్కరూ ఒరిజినల్​ ఆధార్​ తప్పనిసరిగా చూపించాలి.

* పంపాలో స్నానానికి అనుమతి ఉంది. కానీ పంపా, సన్నిధానంలో బస చేసేందుకు అనుమతులు లేవు. పంపాలో వాహనాలకు పార్కింగ్​ వెసులుబాటు కూడా ఉండదు. దర్శనం తర్వాత ప్రసాదం కోసం పంపా వద్ద ఏర్పాట్లు చేశారు.

* దర్శనం ముగించుకున్న వెంటనే ఆలయ ప్రాంగణం నుంచి వెళ్లిపోవాలి.

* నెయ్యాభిషేకం కోసం భక్తులు తీసుకొచ్చే నెయ్యిని సేకరించేందుకు ప్రత్యేక కౌంటర్లను ఏర్పాటు చేశారు. అక్కడే నెయ్యిని తిరిగి ఇస్తారు.

చితిర అట్టవిశేష పూజ కోసం శబరిమల ఆలయాన్ని ఈ నెల 3న తెరిచారు. వేద మంత్రోచ్ఛరణల మధ్య ఆలయం తలుపులు తెరిచిన పండితులు.. స్వామివారికి పూజా కార్యక్రమాలు నిర్వహించారు. ముందస్తు బుకింగ్ చేసుకున్నవారికి స్వామివారిని దర్శించుకునే అవకాశం దక్కింది. పూజా కార్యక్రమాలు పూర్తి చేసి అదే రోజు రాత్రి 9 గంటలకు ఆలయాన్ని మూసివేశారు.