Booker Prize: ‘టూంబ్‌ ఆఫ్ సాండ్‌’ భారతీయ నవలకు ప్రతిష్ఠాత్మక బుకర్ ప్రైజ్‌

 ఈ ఘనత సాధించిన తొలి హిందీ నవల

దిల్లీ: భారతీయ రచయిత్రి గీతాంజలిశ్రీని అంతర్జాతీయ పురస్కారం బుకర్ ప్రైజ్ వరించింది. ఆమె రచించిన ‘టూంబ్‌ ఆఫ్ సాండ్‌’కు ఈ ఘనత దక్కింది. ఈ ప్రతిష్ఠాత్మక పురస్కారం దక్కించుకున్న తొలి హిందీ నవల ఇది. రేత్‌ సమాధి పేరిట గీతాంజలి 2018లో ఈ నవలను రచించారు. తర్వాత అది ‘టూంబ్‌ ఆఫ్ సాండ్‌’గా ఆంగ్లంలోకి తర్జుమా అయింది. ప్రపంచవ్యాప్తంగా ఉన్న పాఠకులకు చేరువైన ఈ పుస్తకం 2022 ఏడాదికి గానూ అవార్డును పొందింది. దీనికింద 50 వేల పౌండ్ల నగదు బహుమతి లభించగా.. ఆంగ్ల అనువాదకురాలు డైసీ రాక్‌వెల్‌తో కలిసి గీతాంజలి ఈ మొత్తాన్ని పంచుకోనున్నారు. 

ఈ రేత్‌ సమాధి వృత్తాంతం.. భర్తను కోల్పోయిన 80 ఏళ్ల వృద్ధురాలి చుట్టూ తిరుగుతుంది. భర్త మరణంతో కుంగిపోయిన ఆమె.. ఆ ప్రతికూల పరిస్థితులను దాటుకొని కొత్త జీవితాన్ని ప్రాంభించేందుకు ప్రయత్నిస్తుంది. ఈ క్రమంలో ఆమె విభజన సమయంలో వదిలివచ్చిన గతాన్ని వెతుక్కుంటూ పాకిస్థాన్‌కు వెళ్లాలని నిర్ణయించుకుంటుంది. ఈ ప్రయాణాన్ని గీతాంజలి హృద్యంగా మలిచిన తీరు న్యాయనిర్ణేతలను మెప్పించింది.

గీతాంజలి ఉత్తర్‌ప్రదేశ్‌లో జన్మించారు. ఆమె చిన్నపిల్లల కథలు, రేత్‌ సమాధితో కలిపి ఐదు నవలలు రచించారు. ఈ పురస్కారం దక్కడంపై అమితమైన సంతోషం వ్యక్తం చేశారు. ‘బుకర్ ప్రైజ్ వస్తుందని నేను కలలో కూడా ఊహించలేదు. దీనిని గెలుస్తానని నేనెప్పుడూ అనుకోలేదు. ఇది గొప్ప గౌరవం’ అని స్పందించారు.