అహ్మదాబాద్‌లో 16 పాఠశాలలకు బాంబు బెదిరింపు

తనిఖీలు చేసి ఉత్తిదేనని తేల్చిన పోలీసులు

అహ్మదాబాద్‌: గుజరాత్‌లోని 25 లోక్‌సభ స్థానాలకు మంగళవారం పోలింగ్‌ జరగనున్న వేళ అహ్మదాబాద్‌లోని 16 పాఠశాలలకు బాంబు బెదిరింపులు రావడం కలకలం రేపింది. ఇందులోని 11 పాఠశాలల్లో పోలింగ్‌ బూత్‌లను ఏర్పాటు చేయనున్నారు. ఈ  నేపథ్యంలో తనిఖీలు చేపట్టిన పోలీసులు అనుమానాస్పద వస్తువులేవీ లభ్యం కాలేదని వెల్లడించారు. సోమవారం ఉదయం 16 పాఠశాలలకు ఈ-మెయిల్‌లో బాంబు బెదిరింపులు వచ్చాయి. పోలీసులు బాంబు నిర్వీర్య దళం, డాగ్‌ స్క్వాడ్‌, క్రైమ్‌ బ్రాంచ్‌ బృందాలతో అక్కడికి చేరుకుని క్షుణ్నంగా తనిఖీలు చేపట్టారు. ఎలాంటి పేలుడు పదార్థాలు లభించలేదని అహ్మదాబాద్‌ సిటీ క్రైమ్‌ బ్రాంచ్‌ తెలిపింది. రష్యా డొమైన్‌ నుంచి ఈ-మెయిల్‌ వచ్చినట్లు వెల్లడించింది. ఎవరూ భయపడాల్సిన అవసరం లేదని, ధైర్యంగా వచ్చి ఓటు వేయాలని ఓ ప్రకటనలో పేర్కొంది.

భద్రత పెంచండి: కేంద్ర హోం శాఖ కార్యదర్శి

ఇటీవల దిల్లీలోని 150కి పైగా పాఠశాలలకూ ఈ-మెయిల్‌ ద్వారా బాంబు బెదిరింపులు వచ్చిన సంగతి తెలిసిందే. దీనిపై కేంద్ర హోం శాఖ కార్యదర్శి అజయ్‌ భల్లా సోమవారం సమీక్ష నిర్వహించారు. పాఠశాలల వద్ద భద్రత పెంచడంతోపాటు సీసీటీవీల ఏర్పాటుకు చర్యలు తీసుకోవాలని సంబంధిత అధికారులను ఆదేశించారు. పాఠశాలలకు వచ్చే ఈ-మెయిళ్లను నిరంతరం వర్యవేక్షించాలని స్పష్టం చేశారు. భవిష్యత్తులో ఈ తరహా ఘటనలు ఎదురైతే అనుసరించాల్సిన ప్రామాణిక నిర్వహణ విధానాలను రూపొందించాలని ఆదేశించారు.