Adipurush: ‘ఆదిపురుష్‌’ టికెట్‌ ఆఫర్‌.. 3డీలో.. ఇప్పుడు ఎంతంటే?

ఇంటర్నెట్‌ డెస్క్‌: ‘ఆదిపురుష్‌’ (Adipurush) చిత్ర బృందం సినీ ప్రియులకు మరో శుభవార్త వినిపించింది. 3డీ వెర్షన్‌కు సంబంధించిన ఈ సినిమా టికెట్లను రూ. 112 (*షరతులు వర్తిస్తాయి) ప్రారంభ ధరతో విక్రయించనున్నట్టు సోషల్‌ మీడియా వేదికగా వెల్లడించింది. ఈ ఆఫర్‌ సోమవారం నుంచి అందుబాటులో ఉంటుందని తెలిపింది. ఆంధ్రప్రదేశ్‌, తెలంగాణ, కేరళ, తమిళనాడు మినహా ఇతర రాష్ట్రాల్లో రూ. 150 ప్రారంభ ధరతో టికెట్ల (3డీ)ను ఈ నెల 22, 23న విక్రయించిన సంగతి తెలిసిందే. ఇప్పుడు అన్ని రాష్ట్రాలకు రూ. 112 ఆఫర్‌ వర్తిస్తుందని టీమ్‌ తెలియజేసింది. రామాయణ ఇతిహాసాన్ని 3డీలో అత్యధిక మంది చూడాలనే ఉద్దేశంతోనే ఈ నిర్ణయం తీసుకున్నట్టు పేర్కొంది. ఎడిటెడ్‌ వెర్షన్‌తో సినిమా ప్రదర్శితమవుతుందని గుర్తుచేసింది.

రామాయణం ఆధారంగా దర్శకుడు ఓం రౌత్‌ (Om Raut) తెరకెక్కించిన ఈ సినిమా ఈ నెల 16న ప్రపంచ వ్యాప్తంగా విడుదలైంది. ఓ వైపు ఈ సినిమాకి చక్కటి ఆదరణ దక్కగా మరోవైపు విడుదలైన నాటి నుంచే విమర్శలు వెల్లువెత్తాయి. ఈ సినిమాలోని పలు సంభాషణలు, నటీనటుల వేషధారణను పలువురు తప్పుబట్టారు. ఈ క్రమంలోనే.. అభ్యంతరం వ్యక్తమైన సీన్స్‌/డైలాగ్స్‌ను చిత్ర బృందం మార్చేసింది. మిశ్రమ స్పందనతోనూ ఈ సినిమా బాక్సాఫీసు వద్ద మంచి వసూళ్లు రాబట్టింది. రాఘవుడిగా ప్రముఖ హీరో ప్రభాస్‌ (Prabhas) నటించిన ఈ సినిమాలో కృతి సనన్‌ (Kriti Sanon).. జానకిగా ఒదిగిపోయారు. సైఫ్‌ అలీఖాన్‌ (Saif Alikhan).. లంకేశ్‌గా ఆకట్టుకున్నారు.