Anand Deverakonda: విజయ్‌ దేవరకొండతో పోటీ.. ఆనంద్‌ రియాక్షన్‌ ఏంటంటే?

ఇంటర్నెట్‌ డెస్క్‌: ప్రముఖ హీరో విజయ్‌ దేవరకొండ (Vijay Deverakonda) సోదరుడిగా తెరంగేట్రం చేసినా తనకంటూ గుర్తింపు తెచ్చుకున్నాడు ఆనంద్‌ దేవరకొండ (Anand Deverakonda). ‘దొరసాని’, ‘మిడిల్‌క్లాస్‌ మెలొడీస్‌’, ‘పుష్పక విమానం’తో ఆకట్టుకున్న ఆయన ‘బేబీ’ (Baby)తో ప్రేక్షకుల అలరించేందుకు సిద్ధమయ్యాడు. సాయి రాజేశ్‌ తెరకెక్కించిన ఈ సినిమా ఈ నెల 14న విడుదల కానుంది. ఈ సందర్భంగా హైదరాబాద్‌లోని ‘ఏఏఏ సినిమాస్‌’లో ట్రైలర్‌ లాంచ్‌ ఈవెంట్‌ నిర్వహించారు. ట్రైలర్‌ విడుదల (Baby Trailer) అనంతరం చిత్ర బృందం మీడియాతో ముచ్చటించింది.

• బేబీ ట్రైలర్‌ కోసం క్లిక్‌ చేయండి..

‘విజయ్‌, మీ యాక్టింగ్‌ ఒకేలా ఉంది. భవిష్యత్తులో మీ ఇద్దరి మధ్య పోటీ ఉంటుందా?’ అనే ప్రశ్న ఎదురవ్వగా ఆనంద్‌ ఇలా స్పందించాడు. జీవితంలో ఏం చేసినా ఆనందంగా ఉండాలనుకుంటానని, పోటీ గురించి ఆలోచిస్తే సృజనాత్మకత పోతుందన్నాడు. పోటీ పడే స్థాయికి తానింకా వెళ్లలేదని చెప్పాడు. దీనిపై దర్శకుడు స్పందిస్తూ.. ‘‘విజయ్‌ దేవరకొండ ఫ్యాన్స్‌.. ఆనంద్‌పై, ఆనంద్‌ అభిమానులు విజయ్‌పై ట్రోల్ చేస్తుంటే చూడాలని ఉంది. ఆ రేంజ్‌కి వెళ్లాలని ఆనంద్‌కి చెప్పా. ఏదో ఒకరోజు అది జరుగుతుంది’’ అని నవ్వుతూ సమాధానమిచ్చాడు. ‘బేబీ’కి ‘కలర్‌ ఫొటో’, ‘ప్రేమదేశం’ సినిమాలకి సంబంధం ఉండదని స్పష్టం చేశాడు. నటనకు అధిక ప్రాధాన్యమున్న పాత్ర తొలి ప్రయత్నంలోనే తనకు దక్కడంపై హీరోయిన్‌ వైష్ణవీ చైతన్య ఆనందం వ్యక్తం చేసింది. ‘బేబీ’లో రియాలిటీని చూపించనున్నట్టు తెలిపింది.