Suma: 30మందిని దత్తత తీసుకున్న సుమ.. ప్రశంసలు కురిపిస్తోన్న నెటిజన్లు

హైదరాబాద్‌: యాంకర్‌ సుమ(Suma)ను ప్రేక్షకులు బుల్లితెర రాణిగా పిలుచుకుంటారు. తెలుగులో గలగలా మాట్లాడుతూ.. సమయానికి తగ్గట్లు పంచ్‌లు వేస్తూ అందరినీ నవ్విస్తుంటుంది సుమ. సినిమాల ప్రీరిలీజ్‌ ఈవెంట్‌లు, టాక్‌ షోలతో ప్రతి రోజూ ఎంటర్‌టైన్‌ చేస్తుంటుంది. బుల్లితెరకే పరిమితం కాకుండా అప్పుడప్పుడూ వెండితెరపై కూడా మెరిసి అలరిస్తుంటుంది. ఇటీవల ‘జయమ్మ పంచాయితీ’(Jayamma Panchayathi) సినిమాతో పలకరించింది సుమ. తాజాగా సుమ చేసిన పనికి అందరూ ఫిదా అవుతున్నారు. ‘గొప్ప మనసు చాటుకున్నావని’ ప్రశంసిస్తున్నారు. 30 మంది విద్యార్థులను దత్తత తీసుకున్నట్లు ప్రకటించిన సుమ.. వాళ్ల పూర్తి బాధ్యతలను తానే చూసుకుంటున్నట్లు తెలిపింది.

ఇటీవల చెన్నై కాలేజీలో జరిగిన కార్యక్రమానికి సుమ అతిథిగా హాజరైంది. అందులో మాట్లాడుతూ..‘‘నేను టీచర్‌ అవుదామనుకున్నాను. కానీ యాంకర్‌ అయ్యాను. ఈరోజు ఈ వృత్తిలో కొనసాగుతున్నానంటే దానికి కారణం మా అమ్మ. ఆమె తెలుగు నేర్చుకొని నాకు నేర్పించింది. ఇందులో కొనసాగడానికి కూడా ఎన్నో సవాళ్లను ఎదుర్కొన్నాను’’ అని చెప్పింది. తానూ సమాజానికి తనవంతూ సేవ చేస్తానని పేర్కొంది. ‘‘సమాజానికి సేవ చేయడం కోసం ‘ఫెస్టివల్ ఫర్‌ జాయ్‌’ (Festival For Joy)అనే సంస్థను ప్రారంభించాము. 30 మంది విద్యార్థులను దత్తత తీసుకున్నాం. వాళ్ల పూర్తి బాధ్యతలను మేమే చూస్తున్నాం. వాళ్లు జీవితంలో స్థిరపడే వరకు మేము సహాయం చేస్తుంటాం’’ అని చెప్పింది. ఈ విషయం తెలిసిన నెటిజన్లు సుమపై పొగడ్తల వర్షం కురిపిస్తున్నారు.