CASH: సీరియల్స్‌లో కన్నీళ్లు.. కారణమదే

హైదరాబాద్‌: స్టార్‌ యాంకర్‌ సుమ వ్యాఖ్యాతగా వ్యవహరిస్తున్న సెలబ్రిటీ గేమ్‌ షో ‘క్యాష్‌.. దొరికినంత దోచుకో’. ఎంతో సరదాగా సాగే ఈ గేమ్‌ షోలో తాజాగా బుల్లితెర తారలు తేజస్విని, మోనీషా, సుహాసిని, వైష్ణవి సందడి చేశారు. తమ కెరీర్‌ గురించి సుమతో ఎన్నో విశేషాలు పంచుకున్నారు. అలాగే తమ గురించి ఎవ్వరికీ తెలియని కొన్ని రహస్యాలను బయటపెట్టారు. తాను ఇప్పటివరకూ ఏ సోషల్‌మీడియా ఫ్లాట్‌ఫామ్‌లోలేనని త్వరలోనే అడుగుపెడుతున్నానని నటి సుహాసిని తెలిపారు. అనంతరం.. కథలో హీరోయిన్స్ ఎప్పుడూ నవ్వుతూ, సంతోషంగా ఉంటే.. అలాంటి సీరియల్స్‌ని ప్రేక్షకులు ఎక్కువగా చూడడం లేదని.. హీరోయిన్స్‌ ఏడుస్తుంటేనే చూస్తున్నారని నటి సుహాసిని సరదాగా చెప్పారు. షోలో భాగంగా సుహాసిని, మౌనీషాలపై సుమ వేసే పంచులు నవ్వులు పూయించేలా ఉన్నాయి. బుల్లితెర తారలతో సుమ చేసిన సరదా అల్లరి చూడాలనుకుంటే వచ్చే శనివారం వరకూ వేచి చూడాల్సిందే.