Dhanush: సమాజంలోని అసమానతల కథే ‘ధనుష్‌ 51’

ధనుష్‌ - శేఖర్‌ కమ్ముల కలయికలో ఓ పాన్‌ ఇండియా చిత్రం ‘ధనుష్‌ 51’గా పట్టాలెక్కనుంది. శుక్రవారం ధనుష్‌ పుట్టినరోజు సందర్భంగా గురువారం ఈ విషయాన్ని అధికారికంగా ప్రకటించారు. సునీల్‌ నారంగ్‌, పుస్కుర్‌ రామ్‌ మోహన్‌ రావు సంయుక్తంగా నిర్మిస్తున్నారు. ఈ మేరకు ఓ కాన్సెప్ట్‌ పోస్టర్‌ను అభిమానులతో పంచుకున్నారు. అందులో ఓవైపు ఖరీదైన భారీ ఆకాశహార్మ్యాలు.. మరోవైపు పేదరికాన్ని ప్రతిబింబించే మురికివాడ.. ఈ రెండింటికీ మధ్యలో పాత వంద రూపాయల నోట్ల కట్ట కనిపించాయి. దీన్ని బట్టి సమాజంలోని అసమానతల నేపథ్యంలో ఈ చిత్రం రూపొందనున్నట్లు అర్థమవుతోంది. ఇందులో ధనుష్‌ మునుపెన్నడూ చూడని సరికొత్త అవతారంలో కనిపించనున్నట్లు చిత్ర వర్గాలు తెలిపాయి. ఇందులో కథానాయకుడు నాగార్జున ఓ కీలక పాత్రలో కనిపించనున్నట్లు ప్రచారం వినిపిస్తోంది. నటీనటులు, ఇతర సాంకేతిక నిపుణుల వివరాల్ని త్వరలో ప్రకటించనున్నారు.