Captain Miller: తెల్లదొరలపై ‘కెప్టెన్‌ మిల్లర్‌’ తిరుగుబాటు

ఈ ఏడాది ఆరంభంలో ‘సార్‌’ సినిమాతో సందడి చేశారు కథానాయకుడు ధనుష్‌. ఇప్పుడు ‘కెప్టెన్‌ మిల్లర్‌’గా యాక్షన్‌ హంగామా రుచి చూపించేందుకు సిద్ధమవుతున్నారు. ఆయన హీరోగా నటించిన ఈ పాన్‌ ఇండియా చిత్రాన్ని అరుణ్‌ మాథేశ్వరన్‌ తెరకెక్కిస్తున్నారు. జి.శరవణన్‌, సాయి సిద్ధార్థ్‌ సంయుక్తంగా నిర్మిస్తున్నారు. ప్రియాంక మోహన్‌ కథానాయిక. శివ రాజ్‌కుమార్‌, సందీప్‌ కిషన్‌ ముఖ్య పాత్రల్లో నటిస్తున్నారు. శుక్రవారం ధనుష్‌ పుట్టినరోజు. ఈ నేపథ్యంలోనే తాజాగా హైదరాబాద్‌లో హీరో సందీప్‌ కిషన్‌ ఈ చిత్ర టీజర్‌ను విడుదల చేశారు. దాదాపు నిమిషంన్నర నిడివి ఉన్న ఈ ప్రచార చిత్రంలో ఆద్యంతం తుపాకుల మోతే వినిపించింది. బందిపోటుగా.. హంతకుడిగా ముద్రపడిన కెప్టెన్‌ మిల్లర్‌ను పట్టుకోవడం కోసం బ్రిటిష్‌ ప్రభుత్వం రంగంలోకి దిగడం.. వాళ్ల పోలీసు సైన్యంపై మిల్లర్‌, అతని బృందం తిరగబడటం.. ఆఖర్లో మిల్లర్‌ ఓ భారీ మిషన్‌ గన్‌తో బ్రిటిష్‌ సైన్యంపై కాల్పులు జరపడం ఆసక్తి రేకెత్తించింది. 1930-40ల నేపథ్యంలో సాగే ఈ చిత్రంలో టైటిల్‌ పాత్రలో ధనుష్‌ ఓ సరికొత్త లుక్‌తో ఆకట్టుకునేలా కనిపించారు. తెల్లదొరల నుంచి సామాన్య ప్రజల్ని రక్షించే విప్లవ వీరుడిగా ఆయన కనిపించనున్నట్లు అర్థమవుతోంది. అలాగే ఇందులో ప్రియాంక మోహన్‌ పాత్ర కూడా యాక్షన్‌ కోణంలో సాగనున్నట్లు టీజర్‌ను బట్టి తెలుస్తోంది. ఈ సినిమా డిసెంబరు 15న ప్రేక్షకుల ముందుకు రానుంది. ఈ చిత్రానికి జి.వి.ప్రకాష్‌ కుమార్‌ సంగీతమందిస్తున్నారు.