బన్నీ స్టైలిష్‌ ఫైట్‌ చూశారా..!

అల్లుఅర్జున్‌ను అభినందించిన గంటా శ్రీనివాసరావు

హైదరాబాద్‌: టాలీవుడ్‌ స్టైలిష్‌స్టార్‌ అల్లు అర్జున్‌ సంక్రాంతి సెలబ్రేషన్స్‌ ప్రారంభమయ్యాయి. ఆయన కథానాయకుడిగా నటించిన ‘అల..వైకుంఠపురములో..’ సంక్రాంతి పండుగ సందర్భంగా నేడు ప్రేక్షకుల ముందుకు వచ్చింది. త్రివిక్రమ్‌ శ్రీనివాస్‌ దర్శకత్వం వహించిన ఈ సినిమా బాక్సాఫీస్‌ వద్ద మంచి విజయం వైపు దూసుకెళుతోంది. అనుకున్నట్లుగానే సినిమా హిట్‌ కావడంతో అల్లు అర్జున్‌.. ‘సంక్రాంతి విన్నర్‌’ అని పేర్కొంటూ ‘అల..వైకుంఠపురములో..’ సినిమా నుంచి ఓ స్పెషల్‌ వీడియోను పోస్ట్‌ చేశారు. అల్లు అర్జున్‌ స్టైలిష్‌గా ఫైట్‌ చేస్తోన్న ఈ వీడియో చూసి అభిమానులు మరోసారి బన్నీ స్టైల్‌కు ఫిదా అయిపోతున్నారు.

మరోవైపు గ్యాప్‌ తీసుకున్నప్పటికీ మంచి సినిమాతో సంక్రాంతికి బన్నీ హిట్‌ కొట్టాడంటూ సినీ ప్రేక్షకులు, నెటిజన్లు ‘అల..వైకుంఠపురములో..’ టీంను ప్రశంసిస్తున్నారు. ఈ నేపథ్యంలో గంటా శ్రీనివాసరావు ట్విటర్‌ వేదికగా ‘అల..వైకుంఠపురములో..’ చిత్రబృందాన్ని అభినందిస్తూ ఓ ట్వీట్‌ పెట్టారు. ‘అల్లు అర్జున్‌కు బ్లాక్‌ బస్టర్‌ కంగ్రాట్స్‌. సంక్రాంతికి మంచి విజయాన్ని సాధించిన ‘అల..వైకుంఠపురములో’ చిత్రబృందానికి నా అభినందనలు.’ అని ఆయన పేర్కొన్నారు.

ఇదిలా ఉండగా ఈ రోజు ఉదయం హైదరాబాద్ ఆర్టీసీ క్రాస్ రోడ్స్‌లో ఉన్న సంధ్య థియేటర్‌లో అభిమానులతో కలిసి బన్నీ, త్రివిక్రమ్‌తోపాటు కథానాయిక పూజాహెగ్డే ‘అల..వైకుంఠపురములో..’ సినిమా వీక్షించారు. దీంతో థియేటర్‌ వద్ద సందడి నెలకొంది. దీనికి సంబంధించిన ఓ ఫొటోలను పూజా హెగ్డే ట్విటర్‌ వేదికగా షేర్‌ చేస్తూ.. ‘బ్లాక్‌బస్టర్‌.. ఆడియన్స్‌తో కలిసి సినిమా చూడడాన్ని బాగా ఎంజాయ్‌ చేశాం. మీ ప్రేమాభిమానాలకు ధన్యవాదాలు.’అని పూజా తెలిపారు. ప్రేక్షకుల నుంచి మంచి స్పందన లభిస్తుండడంతో చిత్రబృందం సక్సెస్‌ సెలబ్రేషన్స్‌ చేసుకుంటున్నారు.