Guntur Kaaram: ఎవరి బాధలకు ఆడే లిరిక్‌ రైటరు

ఈ సంక్రాంతికి ‘గుంటూరు కారం’తో ప్రేక్షకుల్ని పలకరించనున్నారు మహేశ్‌బాబు. ఆయన హీరోగా నటించిన ఈ చిత్రాన్ని త్రివిక్రమ్‌ రూపొందించిన సంగతి తెలిసిందే. ఎస్‌.రాధాకృష్ణ నిర్మాత. శ్రీలీల, మీనాక్షి చౌదరి కథానాయికలు. ఈ సినిమా జనవరి 12న విడుదల కానున్న నేపథ్యంలో ప్రచార కార్యక్రమాల జోరు పెంచారు. ఈ క్రమంలోనే శనివారం ఈ చిత్రం నుంచి ‘‘కుర్చీ మడతపెట్టి’’ అనే లిరికల్‌ గీతాన్ని విడుదల చేశారు. సామాజిక మాధ్యమాల్లో వైరల్‌ అయిన ఓ హుక్‌ లైన్‌తో తమన్‌ ఈ మాస్‌ పాటను సిద్ధం చేశారు. దీనికి తగ్గట్లుగానే రచయిత రామజోగయ్య శాస్త్రి మాస్‌ ప్రేక్షకుల్ని మెప్పించేలా సాహిత్యమందించారు. ‘‘రాజమండ్రి రాగ మంజరి.. మాయమ్మ పేరు తెల్వనోళ్లు లేరు మేస్తిరి. కళాకార్ల ఫ్యామిలీ మరి.. నేను గజ్జ కడితే నిదురపోదు నిండురాతిరి’’ అంటూ ఈ పాట హుషారుగా సాగింది. పాట ఆఖర్లో ‘‘ఏంది అట్టా చూస్తున్నా.. ఇక్కడ ఎవరి బాధలకి ఆడే లిరిక్‌ రైటరు.. మడతపెట్టి పాడేయండి’’ అంటూ మహేశ్‌ చెప్పిన డైలాగ్‌ ప్రత్యేక ఆకర్షణగా నిలిచింది. ఈ గీతాన్ని సాహితి చాగంటి, శ్రీకృష్ణ సంయుక్తంగా ఆలపించారు. శేఖర్‌ మాస్టర్‌ నృత్యరీతులు అందించారు. అన్ని వర్గాల ప్రేక్షకులు మెచ్చేలా మాస్‌ యాక్షన్‌ ఫ్యామిలీ ఎంటర్‌టైనర్‌గా ఈ చిత్రాన్ని ముస్తాబు చేస్తున్నారు. ఈ సినిమాకి కూర్పు: నవీన్‌ నూలి, ఛాయాగ్రహణం: మనోజ్‌ పరమహంస.