Cinema News: ‘ఇండియన్‌-2’ పోస్టర్‌ అదుర్స్‌.. ఆకట్టుకునేలా ‘బుట్టబొమ్మ’ టీజర్‌

హైదరాబాద్‌: అగ్ర కథానాయకుడు, విశ్వనటుడు కమల్‌హాసన్‌ (Kamal Haasan) ప్రధాన పాత్రలో నటిస్తోన్న చిత్రం ‘ఇండియన్‌ -2’ (Indian 2). సోమవారం ఆయన పుట్టినరోజు పురస్కరించుకుని చిత్ర దర్శకుడు శంకర్‌ సరికొత్త పోస్టర్‌ షేర్‌ చేశారు. ఇందులో కమల్‌ వృద్ధుడి గెటప్‌లో కనిపించారు. ఆయన లుక్‌ ఆకట్టుకునేలా ఉంది. పవర్‌ఫుల్‌ కథాంశంతో రూపుదిద్దుకుంటోన్న ఈ సినిమాలో కాజల్‌ కథానాయిక. ప్రస్తుతం ఈ సినిమా చిత్రీకరణ దశలో ఉంది.

ఆకట్టుకునేలా ‘బుట్టబొమ్మ’

అనికా సురేంద్రన్‌, అర్జున్‌ దాస్‌, సూర్య, వశిష్ఠ ప్రధాన పాత్రధారులుగా నటిస్తోన్న ఫీల్‌గుడ్‌ చిత్రం ‘బుట్టబొమ్మ’ (Butta Bomma). సితార ఎంటర్‌టైన్‌మెంట్స్‌ పతాకంపై ఈ సినిమా తెరకెక్కుతోంది. సోమవారం ప్రముఖ దర్శకుడు త్రివిక్రమ్‌ శ్రీనివాస్‌ పుట్టినరోజు పురస్కరించుకుని చిత్ర నిర్మాణ సంస్థ ‘బుట్టబొమ్మ’ టీజర్‌ను విడుదల చేసింది. గ్రామీణ వాతావరణం నేపథ్యంలో సిద్ధమైన ఈ టీజర్‌ ఆకట్టుకునేలా ఉంది.

కల్యాణ్‌రామ్‌ కొత్త సినిమా టైటిల్‌

చాలారోజుల తర్వాత ‘బింబిసార’తో మంచి విజయాన్ని తన ఖాతాలో వేసుకున్నారు నటుడు కల్యాణ్‌ రామ్ (Kalyan Ram)‌. టైమ్‌ ట్రావెల్‌ నేపథ్యంలో తెరకెక్కిన ఈ సినిమా తర్వాత ఆయన మైత్రి మూవీ మేకర్స్‌ పతాకంపై ఓ ప్రాజెక్ట్‌కు సంతకం చేశారు. రాజేంద్రా రెడ్డి దర్శకత్వం వహిస్తున్నారు. ఈ నేపథ్యంలో తాజాగా ఈ సినిమా ఫస్ట్‌లుక్‌ పోస్టర్‌ను చిత్రబృందం విడుదల చేసింది. ఈచిత్రానికి ‘అమిగోస్‌’ అనే టైటిల్‌ ఫిక్స్‌ చేశారు. వచ్చే ఏడాది ఫిబ్రవరి 10న దీన్ని విడుదల చేయనున్నారు.