800 Movie: విజయ్‌ సేతుపతి కుటుంబాన్ని బెదిరించారు: ముత్తయ్య మురళీధరన్‌ వ్యాఖ్యలు

ఇంటర్నెట్‌డెస్క్‌: దిగ్గజ క్రికెటర్‌ ముత్తయ్య మురళీధరన్‌ (Muttiah Muralitharan) జీవితాన్ని ఆధారంగా చేసుకుని తెరకెక్కుతోన్న చిత్రం ‘800’. ఎం.ఎస్‌.శ్రీపతి దర్శకుడు. అక్టోబర్‌ 6వ తేదీన ఇది విడుదల కానుంది. ఈ నేపథ్యంలోనే మురళీధరన్‌ తాజాగా ఓ ఇంటర్వ్యూలో పాల్గొన్నారు. సినిమా విశేషాలను పంచుకున్నారు. అనంతరం ఆయన.. ఈ ప్రాజెక్ట్‌ నుంచి విజయ్‌ సేతుపతి వైదొలగడానికి గల కారణాన్ని వెల్లడించారు.

‘‘800’ చిత్రాన్ని తెరకెక్కించాలని మేము ఎప్పుడో అనుకున్నాం. ఐపీఎల్‌ ఆడుతోన్న రోజుల్లో.. ఓసారి మేము ఉన్న హోటల్‌లోనే విజయ్‌ సేతుపతి సైతం బస చేశారు. షూట్‌ నిమిత్తం ఆయన ఆ హోటల్‌లో ఉండాల్సి వచ్చింది. దీంతో మా దర్శకుడు విజయ్‌ సేతుపతితో నాకు మీటింగ్‌ ఏర్పాటు చేశాడు. దాదాపు ఐదు రోజుల తర్వాత రెండు గంటలపాటు ఆయన మాకు అపాయింట్‌మెంట్‌ ఇచ్చారు. నా ఆట తీరంటే తనకెంతో ఇష్టమని ఆయన నాతో చెప్పారు. ఈ క్రమంలోనే మేము ‘800’ కథ గురించి ఆయనతో డిస్కస్‌ చేశాం. కథ విన్నాక ఆయన ఎంతో ఆనందం వ్యక్తం చేశారు. ఇలాంటి కథలో నటించే అవకాశాన్ని తాను వదులుకోనని.. తప్పకుండా భాగం అవుతానని చెప్పారు. మా మధ్య డీల్‌ కూడా కుదిరింది. ఈ క్రమంలోనే తమిళనాడుకు చెందిన పలువురు వ్యక్తుల నుంచి తీవ్రమైన ఒత్తిడి రావడం.. కుటుంబ సభ్యులు సైతం బెదిరింపులు ఎదుర్కొవడంతో ఆయన ఈ ప్రాజెక్ట్ నుంచి పక్కకు జరిగారు. ఇది కేవలం క్రీడా నేపథ్యంలో తెరకెక్కిన చిత్రమే. రాజకీయ, ఇతర కోణాలు ఈ కథలో లేవు’’ అని ఆయన చెప్పారు.

పిల్లలతో కలిసి మా సినిమా చూడొద్దు: స్టార్‌ హీరో

‘‘నాకు హైదరాబాద్‌ బిర్యానీ అంటే ఎంతో ఇష్టం. అలాగే, ఇక్కడి భోజనాన్ని నేను ఇష్టపడతా. ఇక్కడ నాకు ఎంతో మంది స్నేహితులు ఉన్నారు. విశాఖపట్నం కూడా నాకెంతో ఇష్టం. అక్కడి వాతావరణం నాకు నచ్చుతుంది’’ అని హైదరాబాద్‌లో జరిగిన ఓ ఈవెంట్‌లో ఆయన తెలిపారు.

టెస్ట్‌ క్రికెట్‌ చరిత్రలో 800 వికెట్లు తీసిన ఏకైక బౌలర్‌.. శ్రీలంక ఆఫ్‌ స్పిన్నర్‌ ముత్తయ్య మురళీధరన్‌ జీవిత కథతో తెరకెక్కిన చిత్రం ‘800’. టైటిల్‌ పాత్రను మధుర్‌ మిత్తల్‌ పోషించారు. ఈ సినిమాలో ప్రధాన పాత్రధారుడిగా మొదట విజయ్‌ సేతుపతిని ఎంచుకున్నారు. దీనిపై పలువురు తమిళులు ఆగ్రహం వ్యక్తం చేశారు. విజయ్‌ సేతుపతికి వ్యతిరేకంగా పలు కార్యక్రమాలు చేపట్టారు. దీంతో విజయ్‌ సేతుపతి ఈ ప్రాజెక్ట్‌ నుంచి పక్కకు జరిగారు. శ్రీలంక జాతీయవాదంతో అక్కడి తమిళులు తీవ్రంగా నష్టపోయారు. దీనిని నిరసిస్తూ శ్రీలంకకు చెందిన మురళీధరన్‌ బయోపిక్‌లో ఎలా నటిస్తారంటూ పలువురు తమిళ జాతీయవాదులు, తమిళ సంఘాలు ఆగ్రహం వ్యక్తం చేయడంతో సేతుపతి ఆ ప్రాజెక్టు నుంచి వైదొలిగినట్టు సమాచారం.