Oscars: ఆస్కార్‌ నామినేషన్ల బరిలో 10 భారతీయ చిత్రాలు

ప్రఖ్యాత ఆస్కార్‌ (Oscars) అవార్డుల ప్రకటన తుది అంకానికి చేరుకుంది. విజేతలెవరో ఇంకొద్దిరోజుల్లోనే తేలిపోనుంది. నిర్వాహకుల కమిటీ ది అకాడెమీ ఆఫ్‌ మోషన్‌ పిక్చర్‌ ఆర్ట్స్‌ అండ్‌ సైన్సెన్‌ నామినేషన్‌ బరిలో నిలిచే చిత్రాల వివరాల్ని మంగళవారం ప్రకటించింది. ఇందులో ఆఖరి మెట్టుపై 10 భారతీయ చిత్రాలు ఉండటం ఈ ఏడాది ప్రత్యేకత. ‘ఆర్‌ఆర్‌ఆర్‌’ (RRR), ‘గంగూభాయ్‌ కాఠియావాడి’, ‘ది కశ్మీర్‌ ఫైల్స్‌’, ‘కాంతార’లు షార్ట్‌లిస్ట్‌లో ఉన్నట్టు కమిటీ ప్రకటించింది. భారతీయ అధికారిక ఎంట్రీ చిత్రం ‘ఛెల్లో షో’తోపాటు ‘మీ వసంత్‌రావు’, ‘తుజ్య సాథీ కహీ హై’, ‘రాకెట్రీ: ది నంబి ఎఫెక్ట్‌’, ‘విక్రాంత్‌ రోణ’ ‘ఇరవిన్‌ నిహల్‌’ సైతం బరిలో ఉన్నాయి. ఈ బరిలో మొత్తం 301 చిత్రాలు పోటీపడుతున్నాయి. ‘అవతార్‌: ది వే ఆఫ్‌ వాటర్‌’, ‘బ్లాక్‌ పాంథర్‌: వాకాండ ఫరెవర్‌’, ‘టాప్‌ గన్‌: మావెరిక్‌’లాంటి చిత్రాలు ప్రధాన విభాగంలో ఉన్నాయి. జనవరి 12న ఓటింగ్‌ చేయడం మొదలుపెడతారు.