KrishnamRaju: 70 వేల మందికి భోజన ఏర్పాట్లు చేయనున్న ప్రభాస్‌

ఇంటర్నెట్‌ డెస్క్‌: నటుడు, మాజీ కేంద్ర మంత్రి కృష్ణంరాజు (Krishnam Raju) స్మారక సభ ఈ నెలాఖరున ఆయన స్వగ్రామమైన మొగల్తూరులో జరుగుతుందని సోషల్‌మీడియాలో వార్తలు వస్తున్నాయి. భారీ ఎత్తున నిర్వహించనున్న ఈ సభకు ఆయన కుటుంబ సభ్యులంతా హాజరుకానున్నారట. ప్రముఖ కథానాయకుడు ప్రభాస్ (‌Prabhas) ఈ ఏర్పాట్లను దగ్గరుండి పర్యవేక్షించనున్నారని సమాచారం. దానికి గాను ఆయన ఈ నెల 29న మొగల్తూరు చేరుకుంటారని వార్తలు వస్తున్నాయి. ఈ సభకు మొగల్తూరు చుట్టుపక్కల గ్రామాల నుంచి అధిక సంఖ్యలో ప్రజలు హాజరుకానున్నట్లు తెలుస్తోంది. ఈ నేపథ్యంలో సుమారు 70 వేల మందికి ప్రభాస్‌ భోజన ఏర్పాట్లు చేయించనున్నారట. ప్రజలతో పాటు, కొందరు సినీ ప్రముఖులూ ఈ సభకు హాజరవుతారని సమాచారం. 

కొద్ది రోజుల క్రితం కృష్ణంరాజు అనారోగ్య సమస్యతో తుదిశ్వాస విడిచారు. హైదరాబాద్‌లో ఆయన సంస్మరణ సభను నిర్వహించారు. అయితే కృష్ణంరాజు సొంతూరు మొగల్తూరులోనూ ఈ నెలాఖరున ఆయన స్మారక సభను నిర్వహించాలని కుటుంబసభ్యులు నిర్ణయించారు. గతంలో ప్రభాస్ తండ్రి, నిర్మాత యూవీవీ సత్యనారాయణరాజు సంస్మరణ సభను మొగల్తూరులోనే జరిగింది. ఆ కార్యక్రమం అనంతరం దాదాపు పన్నెండేళ్ల తర్వాత ప్రభాస్‌ సొంతూరుకి వెళ్తున్నారని సమాచారం.