Rashmika: నా మనసులో అతడే ఉన్నాడు.. పెళ్లి కూడా అతడితోనే: రష్మిక

ముంబయి: దక్షిణాది, బాలీవుడ్‌ ప్రాజెక్ట్‌లతో కెరీర్‌లో ఫుల్‌ బిజీగా ఉన్న నటీమణుల్లో ఒకరు రష్మిక (Rashmika). వర్క్‌ లైఫ్‌లో దూసుకెళ్తోన్న ఈ చిన్నది తాజాగా పెళ్లి గురించి మాట్లాడారు. తన మది దోచిన చిన్నవాడి పేరు బయటపెట్టారు. అతడికి కూడా ప్రపంచవ్యాప్తంగా క్రేజ్‌ ఉన్నట్లు చెప్పారు. ఇంతకీ ఆమె మనసులో ఉన్న వ్యక్తి ఎవరంటే..?

బాలీవుడ్‌ నటుడు టైగర్‌ ష్రాఫ్‌తో కలిసి నటి రష్మిక ఇటీవల ఓ కార్యక్రమంలో పాల్గొన్నారు. తన కెరీర్‌, అభిమానుల గురించి ఆమె సరదాగా మాట్లాడారు. ఇందులో భాగంగా ఓ విలేకరి.. ‘మేడమ్‌.. మీరు ఎవరినైనా ప్రేమిస్తున్నారా? మీ వివాహం ఎప్పుడు?’ అని ప్రశ్నించారు. దీనిపై స్పందించిన ఆమె.. ‘‘నాకు ఎప్పుడో నరుటోతో పెళ్లైపోయింది. అతడే నా మనసులో ఉన్నాడు’’ అని ఆమె బదులిచ్చింది. రష్మిక సమాధానాన్ని విన్న టైగర్‌ మొదట షాక్‌ అయ్యారు. అసలు విషయం అర్థం చేసుకుని చిరునవ్వులు చిందించారు.

‘దేవర’లో అవకాశం.. ఏడాదిపాటు అదే మాట అనుకున్నా..

ఇంతకీ అతను ఎవరంటే.. జపానీస్‌ వెబ్‌ సిరీస్‌ ‘నరుటో’లో ప్రధాన పాత్ర. అతడి పాత్రకు ప్రపంచవ్యాప్తంగా ఎంతోమంది అభిమానులున్నారు. రష్మిక కూడా ఆ పాత్రకు వీరాభిమాని. ‘నరుటో’ను తాను ఎప్పటికీ ప్రేమిస్తూనే ఉంటానంటూ ఇప్పటికే పలు సందర్భాల్లో ఇన్‌స్టా వేదికగా పోస్టులు పెట్టారు. అవకాశం వస్తే సిరీస్‌లో నరుటో ప్రేయసిగా కనిపించే హినాటగా తాను ఉండాలనుకుంటున్నట్లు చెప్పారు. ఆమె వలే హెయిర్‌ స్టైల్‌ చేయించుకోవాలని ఉందన్నారు. ఇక రష్మిక ప్రస్తుతం ‘పుష్ప 2’, ‘యానిమల్‌’, ‘రెయిన్‌ బో’ చిత్రాల్లో నటిస్తున్నారు.