Ray Stevenson: రే స్టీవెన్సన్‌ మరణ వార్త.. షాక్‌కు గురయ్యాం: ఆర్‌ఆర్‌ఆర్‌ టీమ్‌

హైదరాబాద్‌: ‘ఆర్‌ఆర్‌ఆర్‌’ (RRR) సినిమాలో కీలకపాత్ర పోషించిన ఐరిష్‌ నటుడు రే స్టీవెన్సన్‌ (Ray Stevenson) (58) మరణవార్తపై చిత్రబృందం సంతాపం ప్రకటించింది. రే మరణవార్త తమను ఎంతగానో కలచివేసిందని ‘ఆర్‌ఆర్‌ఆర్‌’ టీమ్‌ పేర్కొంది. ఈ మేరకు రాజమౌళి, ఎన్టీఆర్‌, రామ్‌చరణ్‌, కార్తికేయ ఆయన్ని గుర్తు చేసుకుంటూ తాజాగా ట్వీట్స్‌ చేశారు. రే మరణవార్తను తాము నమ్మలేకపోతున్నామని అన్నారు.

‘‘షాకింగ్‌.. ఈ వార్తను నేను నమ్మలేకపోతున్నా. రే సెట్‌లో ఉన్నారంటే ఆ ప్రదేశం మొత్తం ఎంతో సంతోషం, ఫుల్‌ ఎనర్జీతో ఉంటుంది. ఆయనతో కలిసి పనిచేయడం నాకెంతో సంతోషాన్ని ఇచ్చింది. ఆయన ఆత్మకు శాంతి చేకూరాలని కోరుకుంటున్నాను. అలాగే ఆయన కుటుంబసభ్యులకు నా ప్రగాఢ సానుభూతి తెలియజేస్తున్నా’’ - రాజమౌళి

‘‘రే స్టీవెన్సన్‌ హఠాన్మరణం షాక్‌కు గురి చేసింది. ఆయనతో కలిసి వర్క్‌ చేయడం గొప్ప అనుభూతి. ఆయన ఆత్మకు శాంతి చేకూరాలని, ఇలాంటి క్లిష్ట సమయంలో ఆయన కుటుంబసభ్యులు, సన్నిహితులకు ఆ భగవంతుడు ధైర్యాన్ని అందించాలని కోరుకుంటున్నా’’ - ఎన్టీఆర్‌

‘‘రే మరణవార్త నన్ను ఎంతో బాధకు గురి చేసింది. డియర్‌ స్కాట్‌.. మీ ఆత్మకు శాంతి చేకూరాలని కోరుకుంటున్నా. మిమ్మల్ని ఎప్పటికీ గుర్తుపెట్టుకుంటా’’ - రామ్‌చరణ్‌

‘‘షాకింగ్‌.. మీరు ఇంత త్వరగా మమ్మల్ని వదలివెళ్లిపోవడం బాధాకరం. మంచి మనసు ఉన్న వ్యక్తి. RIP’’ - ఎస్‌.ఎస్‌.కార్తికేయ

‘‘(ఆర్‌ఆర్‌ఆర్‌లోని ఓ ఫైట్‌ సీక్వెన్స్‌లో ఆయన కారులో నుంచి పైకి ఎగిరి గన్‌తో షూట్‌ చేస్తారు. దానిని ఉద్దేశిస్తూ..) ఈ క్లిష్టమైన సన్నివేశాన్ని చిత్రీకరించినప్పుడు ఆయన వయసు 56 ఏళ్లు. అయినప్పటికీ ఈ స్టంట్‌ చేయడానికి ఆయన ఏమాత్రం సంకోచించలేదు. ‘ఆర్‌ఆర్‌ఆర్‌’ వేదికగా మిమ్మల్ని ఎప్పటికీ గుర్తుపెట్టుకుంటాం.’’ - ఆర్‌ఆర్‌ఆర్‌ టీమ్‌