Pathaan: ‘పఠాన్‌’ సినిమా భారతీయులంతా గర్వపడేలా ఉంటుంది: సిద్ధార్థ్‌ ఆనంద్‌

హైదరాబాద్‌: షారుక్‌ ఖాన్ (Shah Rukh Khan)‌, దీపికా పదుకొణె (Deepika Padukone) ప్రధాన పాత్రల్లో నటించిన చిత్రం ‘పఠాన్‌’ (Pathaan). సిద్ధార్థ్‌ ఆనంద్‌ దర్శకత్వం వహించిన ఈ చిత్రం ట్రైలర్‌ ఇటీవల విడుదలైన విషయం తెలిసింది. హైవోల్టేజ్‌ యాక్షన్‌ సన్నివేశాలతో ఉన్న ఈ ట్రైలర్‌ సినీ ప్రియుల్ని ఆకట్టుకుని ట్రెండింగ్‌లో నిలిచింది. దీనిపై సిద్ధార్థ్‌ ఆనంద్‌(Siddharth Anand) స్పందిస్తూ ట్రెలర్‌కు వచ్చిన ప్రేక్షకాదరణ చూసి సంతోషమేసిందన్నారు. ఈ సందర్భంగా ఆయన మాట్లాడుతూ ‘పఠాన్‌’ గురించి ఆసక్తికర వ్యాఖ్యలు చేశారు.

‘‘ఇప్పటి వరకు ‘పఠాన్’ నుంచి విడుదలైన రెండు పాటలు సంచలనం సృష్టించాయి. తాజాగా రిలీజ్‌ అయిన ట్రైలర్‌ ఈ సినిమా అంచనాలను ఆకాశాన్ని తాకేలా చేసింది. ఎంతో జాగ్రత్తగా దీనిని రూపొందించాం. సినిమా ఏ స్థాయిలో ఉందో ట్రైలర్‌ ద్వారా ప్రేక్షకులకు చెప్పాలనుకున్నాం. ట్రైలర్‌లో చూసింది కొంచెం మాత్రమే.. చూడాల్సింది సినిమాలో చాలా ఉంది. ప్రపంచవ్యాప్తంగా ఉన్న భారతీయులు గర్వపడేలా ఈ చిత్రం ఉంటుందని మేము ఆశిస్తున్నాం. అలాగే హాలీవుడ్‌ చిత్రాలను తలపించేలా దీనిలో యాక్షన్‌ సన్నివేశాలు ఉన్నాయి. కచ్చితంగా పఠాన్‌ అందరినీ అలరిస్తుంది’’ అని సిద్ధార్థ్‌ ఆనంద్‌ అన్నారు.

పూర్తిస్థాయి యాక్షన్‌ ఎంటర్‌టైనర్‌గా తెరకెక్కిన ఈ సినిమా కొంతకాలం నుంచి నిత్యం వార్తల్లో నిలుస్తూనే ఉంది. భారీ అంచనాల మధ్య జనవరి 25న ఈ చిత్రం ప్రేక్షకుల ముందుకు రానుంది. సుదీర్ఘ విరామం తర్వాత షారుక్‌ సినిమా వస్తుండడంతో అభిమానులు ఈ సినిమా కోసం ఆసక్తిగా ఎదరుచూస్తున్నారు.