Sridevi Soda Center: అలరిస్తోన్న ‘చుక్కల మేళం దిక్కుల తాళం’ గీతం

ఇంటర్నెట్‌ డెస్క్‌: సుధీర్‌ బాబు కథానాయకుడిగా దర్శకుడు కరుణ కుమార్‌ తెరకెక్కిస్తోన్న చిత్రం ‘శ్రీదేవి సోడా సెంటర్‌’. ఆనంది కథానాయిక. విజయ్‌ చిల్లా, శశి దేవిరెడ్డి నిర్మాతలు. ఈ సినిమాని ఆగస్టు 27న ప్రేక్షకుల ముందుకు తీసుకొస్తున్న నేపథ్యంలో తాజాగా ఓ మెలొడీని విడుదల చేసింది చిత్ర బృందం. ‘చుక్కల మేళం దిక్కుల తాళం’ అంటూ సాగే ఈ గీతం అన్ని వర్గాల శ్రోతల్ని అలరించేలా ఉంది. సుధీర్‌- ఆనంది జోడీ కనువిందు చేస్తోంది. ఇద్దరి హావభావాలు ఆకట్టుకుంటున్నాయి. పెళ్లి నేపథ్యంలో రూపొందించిన ఈ పాటని అనురాగ్‌ కులకర్ణి ఆలపించారు. కల్యాణ్ చక్రవర్తి సాహిత్యం అందించారు. మణిశర్మ స్వరాలు సమకూర్చారు. ఈ చిత్రంలో సూరిబాబుగా కనిపించనున్నారు సుధీర్‌. శ్రీదేవిగా ఆనంది సందడి చేయనుంది. నరేశ్‌, రఘుబాబు, అజయ్‌, సత్యం రాజేశ్‌, హర్షవర్ధన్‌ తదితరులు నటించిన ఈ చిత్రానికి కూర్పు: శ్రీకర్‌ ప్రసాద్‌, ఛాయాగ్రహణం: శ్యామ్‌దత్‌ సైనుద్దీన్‌.