Shahid Kapoor: ‘సుల్తాన్‌’ దర్శకుడితో కబీర్‌సింగ్‌

‘కబీర్‌సింగ్‌’ భారీ విజయం తర్వాత ఆచితూచి కథల్ని ఎంచుకుంటూ ముందుకు సాగుతున్నారు బాలీవుడ్‌ కథానాయకుడు షాహిద్‌కపూర్‌. ఇటీవలే డిజిటల్‌ ఎంట్రీ ఇచ్చి దర్శక ద్వయం రాజ్‌ అండ్‌ డీకే దర్శకత్వంలో ఓ వెబ్సిరీస్‌లో నటిస్తున్నారు. ఈ సిరీస్‌ చిత్రీకరణ పూర్తయింది. తాజాగా ఆయన నుంచి రానున్న కొత్త చిత్రాన్ని ప్రకటించారు. ‘సుల్తాన్‌’, ‘టైగర్‌ జిందా హై’ లాంటి చిత్రాలతో భారీ విజయాలు అందుకున్న దర్శకుడు అలీ అబ్బాస్‌ జాఫర్‌ ఈ చిత్రానికి దర్శకత్వం వహించనున్నారు. ఈ విషయాన్ని షాహిద్‌ ప్రకటించారు. క్రైమ్‌, యాక్షన్‌ కథతో ఈ చిత్రం తెరకెక్కనుంది. షాహిద్‌ నటించిన ‘జెర్సి’ థియేటర్లలో విడుదల కావడానికి సిద్ధంగా ఉంది. అలీ అబ్బాస్‌ నుంచి రూపొందించిన ‘తాండవ్‌’ వెబ్‌సిరీస్‌ వివాదాలు ఎదుర్కొన్న సంగతి తెలిసిందే.