Vijay Deverakonda: కన్నీళ్లు ఆగట్లేదు.. ‘ఖుషి’ విడుదలపై విజయ్ దేవరకొండ ఎమోషనల్‌ ట్వీట్‌

హైదరాబాద్‌: హీరో విజయ్‌ దేవరకొండ (Vijay Deverakonda) అభిమానులు ‘ఖుషి’ (kushi) కోసం ఎంతగా ఎదురుచూస్తున్నారో.. ఆయన కూడా అంతే ఆసక్తిగా ఉన్నారు. ఎందుకంటే గత కొన్నేళ్లుగా ఈ యంగ్‌ హీరో ఖాతాలో సరైన హిట్‌ చేరలేదు. దీంతో తన ఆశలన్నీ ‘ఖుషి’పైనే పెట్టుకున్నాడు విజయ్‌. నేడు ప్రేక్షకుల ముందుకు వచ్చిన ఈ సినిమాపై ఆయన ఎమోషనల్‌ ట్వీట్‌ చేశాడు. ప్రస్తుతం అది వైరలవుతోంది.

‘‘నా విజయం కోసం మీరంతా నాతో పాటు 5 సంవత్సరాల నుంచి ఎదురుచూస్తున్నారు. నేను మంచి సినిమా ఇస్తానని ఓపిగ్గా ఉన్నారు. ఈరోజు ‘ఖుషి’తో మేం సాధించాం. నా చుట్టూ ఉన్నవాళ్లు సంతోషంతో నన్ను నిద్రలేపారు. కొన్ని వందల మెసేజ్‌లు, ఫోన్‌లు వస్తున్నాయి. ఇదంతా చూస్తుంటే కన్నీళ్లు పెట్టుకోకుండా ఉండలేకపోతున్నా. మీ కుటుంబంతో వెళ్లి సినిమాను ఎంజాయ్‌ చేయండి. మీరంతా ‘ఖుషి’ని ఆదరిస్తారని నాకు తెలుసు. లవ్యూ’’ అని రాశారు. దీనికి ఎమోషనల్‌ అనే హ్యాష్‌ ట్యాగ్‌ను కూడా విజయ్‌ దేవరకొండ జోడించారు. 

14 భాషల్లో అనుష్క సినిమా.. హీరో ఎవరంటే?

ఇక ‘ఖుషి’ విడుదలకు కొన్ని గంటల ముందు కూడా విజయ్‌ దేవరకొండ ఓ ప్రత్యేక వీడియో పోస్ట్‌ చేశారు. ‘అప్పుడే ఈ చిత్రం విడుదల దాకా వచ్చిందంటే నమ్మలేకపోతున్నా. మీరంతా నన్ను వెండితెరపై చూసి ఏడాది అవుతోంది. మీ అందరి ముఖాల్లో చిరునవ్వు చూడడం కోసం నేనెంతగా ఎదురుచూస్తున్నానో మాటల్లో చెప్పలేను’ అని అన్నారు.  ఇక శివ నిర్వాణ దర్శకత్వంలో తెరకెక్కిన ఈ చిత్రంలో విజయ్‌దేవరకొండ సరసన సమంత (Samantha) నటించారు. ప్రస్తుతం వీరి అభిమానులంతా థియేటర్లలో సందడి చేస్తున్నారు.