GOAT:రయ్‌రయ్‌.. విజయ్‌

విజయ్‌ కథానాయకుడిగా వెంకట్‌ ప్రభు తెరకెక్కిస్తున్న చిత్రం ‘గ్రేటెస్ట్‌ ఆఫ్‌ ఆల్‌ టైమ్‌’. ఏజీఎస్‌ ఎంటర్‌టైన్‌మెంట్‌ సంస్థ నిర్మిస్తోంది. మీనాక్షి చౌదరి కథానాయిక. ప్రభుదేవా, స్నేహా, లైలా తదితరులు కీలక పాత్రలు పోషిస్తున్నారు. ఈ సినిమా ప్రస్తుతం చెన్నైలో శరవేగంగా చిత్రీకరణ జరుపుకుంటోంది. ఈ షెడ్యూల్‌ పూర్తయిన తర్వాత చకచకా కొత్త షెడ్యూల్స్‌ ప్రారంభించేందుకు చిత్రబృందం సన్నాహాలు చేసుకుంటోంది. మరికొన్ని రోజుల్లో చెన్నై షెడ్యూల్‌ పూర్తి కానుండగా.. ఈ నెలాఖరు నుంచి శ్రీలంకలో.. ఆ వెంటనే ఫిబ్రవరి నుంచి రాజస్థాన్‌లో వరుస షెడ్యూల్స్‌ పూర్తి చేయనున్నారు. దీనిలో భాగంగా పోరాట ఘట్టాలతో పాటు కీలక సన్నివేశాలు చిత్రీకరించనున్నట్లు తెలిసింది. ఈ రెండూ పూర్తయ్యాక యూనిట్‌ ఇస్తాంబుల్‌కు పయనం కానుంది. మార్చి చివరి నాటికి మొత్తం చిత్రీకరణ పూర్తి చేయనున్నట్లు ప్రచారం వినిపిస్తోంది. గ్రాఫిక్స్‌ హంగులతో కూడిన ఈ సైన్స్‌ ఫిక్షన్‌ యాక్షన్‌ ఎంటర్‌టైనర్‌లో విజయ్‌ రెండు కోణాలున్న పాత్రలో కనిపించనున్నారు. సంగీతం: యువన్‌ శంకర్‌ రాజా, ఛాయాగ్రహణం: సిద్ధార్థ నుని.