Chahal- Dhanashree: అప్పటికి చాహల్‌ ఎవరో తెలియదు..! ధనశ్రీ ఆసక్తికర వ్యాఖ్యలు

ఇంటర్నెట్‌ డెస్క్‌: టీమ్‌ ఇండియా క్రికెటర్‌ యుజ్వేంద్ర చాహల్ (Yuzvendra Chahal), కొరియోగ్రాఫర్‌ ధనశ్రీ వర్మ(Dhanashree Verma)ల జంట నెట్టింట సందడి చేస్తుంటుంది. ధనశ్రీ వద్ద చాహల్‌ డ్యాన్స్‌ క్లాసులకు వెళ్లగా.. ఆ పరిచయం కాస్త ప్రేమగా మారి, 2020 డిసెంబరులో వీరిద్దరూ వివాహం చేసుకున్న సంగతి తెలిసిందే. ఇటీవల విడాకుల వార్తలు వచ్చినప్పటికీ.. అలాంటిదేమీ లేదని కొట్టిపారేశారు. ఈ క్రమంలోనే తాజాగా ఓ ఇంటర్వ్యూలో పాల్గొన్న ఈ జంట.. తమ మధ్య పరిచయం, అనుబంధం, ఒకరిలో ఒకరికి నచ్చిన అంశాలు తదితర ఆసక్తికర విషయాలను పంచుకున్నారు. చాహల్‌ పరిచయమైనప్పుడు అతను క్రికెటర్‌ అని కూడా తనకు తెలియదని ధనశ్రీ పేర్కొనగా.. నిన్ను పెళ్లి చేసుకోవాలనుకుంటున్నానని ఆమెను నేరుగానే అడిగినట్లు చాహల్‌ అప్పటి జ్ఞాపకాలను గుర్తుచేసుకున్నాడు.

‘లాక్‌డౌన్‌ సమయంలో డ్యాన్స్‌ నేర్చుకోవాలనే ఆసక్తితో నేనే మొదటగా ధనశ్రీకి మెసేజ్‌ చేశాను. అప్పటికే టిక్‌టాక్‌, ఇతర వీడియోల్లో ఆమె డ్యాన్స్‌ చూశా. ఆ తర్వాత ఆన్‌లైన్‌ క్లాసులు మొదలయ్యాయి. మొదటి రెండు నెలలు డ్యాన్స్‌ గురించి తప్ప ఇతర విషయాలేమీ మాట్లాడుకోలేదు. అప్పటికి ఇద్దరం స్నేహితులం కూడా కాదు’ అని చాహల్‌ వెల్లడించాడు. మహమ్మారి విలయం సృష్టిస్తోన్న సమయంలోనూ ధనశ్రీ ఎంతో ఉత్సాహంగా, ఆనందంగా ఉండటం తనను ఆకట్టుకుందని పేర్కొన్నాడు. ఇదేలా సాధ్యమని అడిగానని.. అక్కడే ఇద్దరి మధ్య మాటలు మొదలయ్యాయని చెప్పాడు. ‘ఆమె తీరు నచ్చింది. నా మాదిరే ఆమె కూడా స్వశక్తితో ఎదిగింది. ఆమెను ఇష్టపడుతున్నానని మా అమ్మకు చెప్పా. డేట్‌ చేయాలని లేదు.. నిన్ను పెళ్లి చేసుకోవాలనుకుంటున్నానని ధనశ్రీని కూడా నేరుగానే అడిగేశా’ అని తెలిపాడు.

వేలంలో తీసుకుంటామని హామీ ఇచ్చారు.. ఒక్క బిడ్‌ కూడా వేయలేదు: చాహల్‌

చాహల్ మర్యాదపూర్వక వ్యవహార శైలి, ముక్కుసూటితనం తననెంతో ఆకట్టుకున్నాయని ధనశ్రీ వెల్లడించింది. ‘తమ అభిరుచుల విషయంలో అమితాసక్తి చూపే వ్యక్తులంటే నాకు ఇష్టం. డ్యాన్స్‌ నేర్చుకునే విషయంలో చాహల్‌ ఎంతో ఉత్సాహం, శ్రద్ధ కనబర్చేవాడు. నాకది నచ్చింది. అనేక విషయాల్లో అతనిలా ఎవరూ ఉండలేరు’ అని పేర్కొంది. జీవిత భాగస్వామి విషయంలో ఆప్షన్లను వెతుక్కోవడం.. ఎంతోమందిని కలవడం వంటివి చేస్తున్న ప్రస్తుత తరంలో.. నేరుగా పెళ్లి ప్రస్తావన తీసుకురావడం సానుకూల ముద్ర వేసింది. పెళ్లి విషయంలో నాపై ఎప్పుడూ ఒత్తిడి లేదు. జీవితంలో చాలా సంతోషంగా ఉన్నా. అంతా బాగుంది’ అని చెప్పింది. అయితే, చాహల్‌ పరిచయమైనప్పుడు అతను ఎవరనేది తెలియదని.. అతను టీమ్‌ ఇండియా జట్టులో అరంగేట్రం చేసేనాటికి తాను క్రికెట్‌ చూడటం మానేసినట్లు ధనశ్రీ పేర్కొంది.