Gaza: ఇజ్రాయెల్‌ దాడులు.. గాజాలో 20వేలు దాటిన మృతుల సంఖ్య

జెరూసలెం: గాజా (Gaza)పై ఇజ్రాయెల్‌ (Israel) దాడులు కొనసాగుతూనే ఉన్నాయి. ఇజ్రాయెల్‌ సైన్యం(ఐడీఎఫ్‌) జరిపిన దాడుల్లో శనివారం ఒక్కరోజే 200 మంది ప్రజలు ప్రాణాలు కోల్పోయారని గాజా అధికారులు తెలిపారు. హమాస్‌-ఇజ్రాయెల్‌ యుద్ధం మొదలైన నాటి నుంచి ఇప్పటి వరకు గాజాలో 20,258 మంది మృతి చెందారని హమాస్‌ ఆధీనంలోని ఆరోగ్యశాఖ వెల్లడించింది. మృతుల్లో ఎక్కువ మంది మహిళలు, చిన్నారులే ఉన్నారని తెలిపింది. 

గాజాలో ఇజ్రాయెల్‌ సృష్టించిన విధ్వంసం కారణంగా అక్కడి ప్రజలు పెద్ద సంఖ్యలో సురక్షిత ప్రాంతాలకు తరలివెళ్తున్నారు. 24 లక్షల జనాభాలో 19 లక్షల మంది శరణార్థి శిబిరాలు, టెంట్లలో తలదాచుకోవాల్సి వస్తోందని ఐక్యరాజ్యసమితి ఆవేదన వ్యక్తం చేసింది. నీరు, ఆహారం, వైద్య సేవలు లేక ప్రజలు తీవ్ర ఇబ్బందులు ఎదుర్కొంటున్నారని పేర్కొంది. వారికి సాయం చేయాలంటే మానవత్వంతో కాల్పులు విరమించడం ఒక్కటే మార్గమని ఐరాస ప్రధాన కార్యదర్శి ఆంటోనియో గుటెరస్‌ చెప్పారు. ఇజ్రాయెల్‌ తన చర్యలతో మానవతా సాయానికి అడ్డంకులు సృష్టిస్తోందని మండిపడ్డారు. 

హమాస్‌ దాడిలో ఐదుగురు ఇజ్రాయెల్‌ సైనికులు మృతి

హమాస్‌ మిలిటెంట్ల అంతమే లక్ష్యంగా గాజాపై ఇజ్రాయెల్‌ సైన్యం విరుచుకుపడుతున్న విషయం తెలిసిందే. తాజాగా హమాస్‌తో జరిగిన పరస్పర దాడుల్లో తమ బలగాలకు చెందిన ఐదుగురు సైనికులు మృతి చెందినట్లు ఇజ్రాయెల్‌ సైన్యం ప్రకటించింది. శుక్రవారం దక్షిణ గాజాలో నలుగురు, శనివారం ఉత్తర గాజాలో ఓ సైనికుడు ప్రాణాలు కోల్పోయినట్లు వెల్లడించింది.

గాజాలో భీకర దాడి.. ఒకే కుటుంబానికి చెందిన 76 మంది మృతి..!

నెతన్యాహుకి బైడెన్‌ ఫోన్‌

గాజాలో శనివారం జరిగిన భీకర దాడుల నేపథ్యంలో ఇజ్రాయెల్‌ ప్రధాన మంత్రి నెతన్యాహుతో అమెరికా అధ్యక్షుడు జో బైడెన్‌ ఫోన్‌లో మాట్లాడారు. ప్రస్తుత పరిస్థితులపై వారిద్దరు చర్చించినట్లు శ్వేతసౌధం ప్రతినిధులు తెలిపారు. ఇజ్రాయెల్‌కు అమెరికా ఎప్పుడూ మద్దతుగానే ఉంటుందని, అయితే.. గాజాలో మృతుల సంఖ్య పెరగడం, మానవతా సాయం సంక్షోభంలో పడటం పట్ల ఆందోళన చెందుతున్నామని పేర్కొన్నారు.