జడ్జి పదవి కోసం మరోసారి అరుణ్‌ సుబ్రమణియన్‌ పేరు

మళ్లీ నామినేట్‌ చేసిన బైడెన్‌

వాషింగ్టన్‌: అమెరికా అధ్యక్షుడు బైడెన్‌ భారతీయ-అమెరికన్‌ న్యాయవాది అరుణ్‌ సుబ్రమణియన్‌ను న్యూయార్క్‌లోని దక్షిణ జిల్లా(సదరన్‌ డిస్ట్రిక్ట్‌) కోర్టు న్యాయమూర్తి పదవికి మరోసారి నామినేట్‌ చేశారు. ఈ మేరకు శ్వేతసౌధం నుంచి సెనెట్‌కు అధికారిక సమాచారం అందింది. గత సెప్టెంబరులో అరుణ్‌ సుబ్రమణియన్‌ను బైడెన్‌ తొలిసారి నామినేట్‌ చేశారు. అరుణ్‌ నియామక నిర్ధారణ కోసం సెనెట్‌ జ్యుడిషియరీ కమిటీ డిసెంబరు 13న సమావేశం నిర్వహించింది. అయితే కాంగ్రెస్‌ దాన్ని ఆమోదించలేదు. ఈ నేపథ్యంలో బైడెన్‌ మరోసారి ఆయన్ను నామినేట్‌ చేశారు. ఈసారి ఆయన నియామకం ఖరారు అయితే ఈ పదవిని అలంకరించే తొలి దక్షిణాసియా వ్యక్తిగా నిలవనున్నారు. 1979లో పిట్స్‌బర్గ్‌లో జన్మించిన అరుణ్‌ న్యాయవాదిగా విశేష సేవలందించారు.