అల్‌-జజీరాపై నిషేధం

టెల్‌ అవీవ్‌: హమాస్‌కు అనుకూలంగా.. పక్షపాతంతో వార్తలను ప్రసారం చేస్తోందన్న అభియోగాలతో అల్‌-జజీరా అంతర్జాతీయ వార్తా ఛానల్‌పై ఆదివారం ఇజ్రాయెల్‌ నిషేధం విధించింది. ప్రధాని బెంజమిన్‌ నెతన్యాహు నేతృత్వంలో మంత్రి మండలి ఈ నిర్ణయం తీసుకుంది. ఈ తీర్మానానికి గత నెల ఒకటో తేదీనే ఇజ్రాయెల్‌ పార్లమెంటు ఆమోదం తెలిపింది. నిషేధాన్ని అల్‌-జజీరా ఖండించింది. మానవహక్కుల ఉల్లంఘనగా పేర్కొంది. న్యాయపరంగా అందుబాటులో ఉన్న అన్ని అవకాశాలను ఉపయోగించుకొని ఈ నిషేధ ఉత్తర్వులను సవాల్‌ చేస్తామని తెలిపింది. ఓవైపు కాల్పుల విరమణపై హమాస్‌-ఇజ్రాయెల్‌ను ఒప్పించేందుకు ప్రయత్నాలు జరుగుతున్న కీలక సమయంలో ఈ నిర్ణయం వెలువడటం గమనార్హం. చర్చల్లో అమెరికా, ఈజిప్టుతో పాటు ఖతార్‌ కూడా కీలక పాత్ర పోషిస్తోంది. అల్‌-జజీరా ఛానల్‌ ఖతార్‌ ప్రభుత్వానికి చెందినది. మంత్రి మండలి తీర్మానంతో అల్‌-జజీరా ఛానల్‌ పరికరాలను ఇజ్రాయెల్‌ అధికారులు జప్తు చేయొచ్చు. ఇజ్రాయెల్‌లో టీవీ ప్రసారాలను నిలిపివేయొచ్చు. వెబ్‌సైట్లను కూడా బ్లాక్‌ చేయొచ్చు.