Wikipedia: పాక్‌లో వికీపీడియాపై నిషేధం.. స్పందించిన వికీమీడియా

ఇస్లామాబాద్‌: పాకిస్థాన్(Pakistan) తన దేశంలో వికీపీడియా(Wikipedia) సేవలను బ్లాక్‌ చేసింది. ప్రభుత్వం చట్టవిరుద్ధంగా భావించిన సమాచారాన్ని తొలగించడంలో వికీ విఫలం కావడంతో ఈ నిర్ణయం తీసుకుంది. కాగా ఈ ఫ్రీ ఎన్‌సైక్లోపీడియాను నిర్వహించే వికీ మీడియా దీనిపై స్పందించింది. సేవలను మరలా పునరుద్ధరించాలని అభ్యర్థించింది. 

మీడియా కథనాల ప్రకారం.. మత విరుద్ధమైన సమాచారాన్ని తొలగించాలని పాకిస్థాన్ టెలికాం అథారిటీ(PTA) ఇదివరకే వికీపీడియాను ఆదేశించింది. కోర్టు ఆదేశాల మేరకు వికీ యాక్సెస్‌ చేసుకునే వేగాన్ని తగ్గించింది. కానీ ప్రభుత్వం ఇచ్చిన నోటీసు ప్రకారం.. చట్టవిరుద్ధమైన సమాచారాన్ని తొలగించడంలో ఈ సంస్థ విఫలమైంది.  దాంతో పీటీఏ దానిని బ్లాక్‌ చేసింది. ఈ విషయాన్ని పీటీఏ ప్రతినిధి ధ్రువీకరించారు. దీనిపై వికీమీడియా ఫౌండేషన్ ఓ ప్రకటన విడుదల చేసింది. పాక్‌ ప్రభుత్వం వికీపీడియా, వికీమీడియా ప్రాజెక్టులను బ్లాక్‌ చేసిందని తెలిపింది. ఆ నిషేధాన్ని ఎత్తివేయాలని అందులో కోరింది. ప్రపంచవ్యాప్తంగా కోట్లాది మంది ప్రజలు కావాల్సిన సమాచారం కోసం  వికీపీడియా సేవల్ని వినియోగించుకుంటున్న సంగతి తెలిసిందే.