Pakistan: పాక్‌ గగనతలంలోకి సూపర్‌సోనిక్‌ ప్రొజెక్టైల్‌.. భారత్‌కు పాకిస్థాన్‌ సమన్లు..!

దర్యాప్తు జరిపించాలని కోరిన పాకిస్థాన్‌ విదేశాంగశాఖ

దిల్లీ: భారత్‌కు చెందిన ఓ గుర్తుతెలియని సూపర్‌సోనిక్‌ క్షిపణిగా భావిస్తోన్న ‘ఫ్లయింగ్‌ ఆబ్జెక్ట్‌’ తమ భూభాగంలో పడిందని పాకిస్థాన్‌ ఆరోపించింది. ఈ అనుమానాస్పద పరికరం పాకిస్థాన్‌లోని మియాన్‌ చన్నూ నగరంలో కుప్పకూలినట్లు వెల్లడించింది. పాకిస్థాన్‌ గగనతల సరిహద్దును ఉల్లంఘించారని నిరసిస్తూ భారత రాయబారికి అక్కడి విదేశాంగశాఖ సమన్లు జారీ చేసింది.

‘ఈనెల 9వ తేదీన భారత్‌ వైపు నుంచి ప్రయోగించిన ఓ వేగవంతమైన ‘అన్‌-ఐడెంటిఫైడ్‌ ఫ్లయింగ్‌ ఆబ్జెక్ట్‌’ పాకిస్థాన్‌ భూభాగంలోకి దూసుకొచ్చింది. ఆ ప్రయోగం పాక్‌లోని పౌరుల ఆస్తులకు నష్టం కలిగించడంతోపాటు ఇక్కడి ప్రజలను తీవ్ర భయాందోళనలకు గురిచేసింది’ అని భారత రాయబారికి పాకిస్థాన్‌ విదేశాంగ శాఖ తెలిపింది. అంతేకాకుండా తమ గగనతలంలోకి వచ్చిన ఈ అనుమానాస్పద ఫ్లయింగ్‌ ఆబ్జక్ట్‌ వల్ల ఇక్కడి దేశీయ/అంతర్జాతీయ విమాన ప్రయాణాలకు తీవ్ర ఆటంకం కలిగిందని ఆందోళన వ్యక్తం చేసింది.

భవిష్యత్తులో ఇటువంటి ఉల్లంఘనలు పునరావృతం కాకుండా సమర్థవంతమైన చర్యలు తీసుకోవాలని భారత్‌కు సూచించింది. అంతేకాకుండా ఈ వ్యవహారంలో పూర్తిస్థాయి దర్యాప్తు జరిపించి.. ఆ సమాచారం తమకు తెలియజేయాలని పాక్‌ విదేశాంగశాఖ భారత రాయబారికి స్పష్టం చేసింది.