Colombia: బుల్‌ఫైట్‌ జరుగుతుండగా స్టేడియం గ్యాలరీ కూలి..

ఇంటర్నెట్‌డెస్క్‌: బుల్‌ఫైట్‌ జరుగుతుండగా స్టేడియంలోని ప్రేక్షకుల గ్యాలరీ కుప్పకూలి నలుగురు మృతి చెందిన ఘటన కొలంబియాలోని ఎల్‌ ఎస్పినల్‌లో చోటు చేసుకొంది.  ఈ ప్రమాదంలో 300 మందికి గాయపడ్డారు. ఎల్‌ ఎస్పినల్‌లో సంప్రదాయ కొర్రలెజ క్రీడను నిర్వహించారు. దీనిలో పాల్గొనేవారు ఒక దున్నపోతును కవ్విస్తూ  ఆడతారు. క్రీడ జరుగుతున్న సమయంలో ఒక్కసారి స్టేడియంలోని ప్రేక్షకుల గ్యాలరీ కుప్పకూలిపోయింది. ఓ పక్క శిథిలాల నుంచి ప్రజలు బయటకు వస్తుండగా.. స్టేడియంలో క్రీడను మాత్రం కొనసాగించారు. తాజాగా ఈ వీడియో వైరల్‌గా మారింది.  సాన్‌ పెడ్రో అనే పండుగలో భాగంగా ఈ క్రీడను నిర్వహించారు. 

ఈ ఘటనలో ఇద్దరు మహిళలు, ఒక పురుషుడు, ఒక చిన్నారి మృతి చెందినట్టు టొలిమా గవర్నర్‌ జోస్‌ రిచర్డ్‌ ఓర్జ్‌కో పేర్కొన్నారు. గాయాలతో 322 మంది చికిత్స పొందుతున్నట్లు పేర్కొన్నారు. వీరిలో కూడా నలుగురి పరిస్థితి విషమంగా ఉండటంతో ఐసీయూలో చికిత్స పొందుతున్నారు.  ఈ క్రీడ కారణంగా తరచూ మనుషులు ప్రాణాలు కోల్పోతున్నారు. ఈ నెల మొదట్లో కూడా దున్నపోతు దాడిచేయడంతో ఒక వ్యక్తి మృతి చెందాడు. మనుషులు, పశువులు ప్రాణాలు కోల్పోయే క్రీడలను అనుమతించ వద్దని కొత్తగా అధ్యక్షుడిగా ఎన్నికైన గుస్తోవ్‌ పెట్రో స్థానిక అధికారులను ఆదేశించారు.