అచ్చయినవి చదివితేనే...

‘ఆ స్కూల్లో ఎల్‌కేజీ నుంచే డిజిటల్‌ క్లాసురూమ్‌లు ఉన్నాయి’ అంటూ పిల్లల్ని వాటిల్లో చేర్పించడానికి ముందు... ఓసారి ఆలోచించుకోవాలంటున్నారు పరిశోధకులు. ‘విద్యార్థులు డిజిటల్‌ ఉపకరణాలతో చదవడం మంచిదా- ముద్రించిన వాటితో నేర్చుకుంటే మంచిదా?’ అన్న ప్రశ్నతో స్పెయిన్‌కి చెందిన వాలెన్షియా యూనివర్సిటీ పరిశోధకులు ఓ అధ్యయనం నిర్వహించారు. సుమారు 4.7 లక్షల మంది విద్యార్థుల తీరుతెన్నుల్ని విశ్లేషించారు. ట్యాబ్‌లోనో, ఫోన్‌లోనో పాఠాలు చదివేటప్పుడు వచ్చే పాప్‌-అప్స్‌, స్క్రీన్‌ వెలుతుర్లో ఏర్పడే మార్పులు వంటివి విద్యార్థుల్ని డిస్టర్బ్‌ చేస్తున్నాయని పసిగట్టారు. హైస్కూలు పిల్లలు కొంతవరకూ ఈ అవాంతరాలని పక్కకిపెట్టి ఏకాగ్రత చూపగలుగుతున్నా... అంతకన్నా చిన్నవాళ్లకి అది సాధ్యం కావడంలేదట. ఇలా డిజిటల్‌ ఉపకరణాలకి అలవాటుపడ్డ చిన్నారులు యూట్యూబుకో, ఫేస్‌బుక్‌లాంటి సామాజిక మాధ్యమాల ఆకర్షణకో త్వరగా గురవుతున్నారట. వాటిల్లోని పైపై సంభాషణలూ, హాస్యాలూ, సంక్షిప్త సమాచారాలకి అలవాటుపడి లోతైన ఏ విషయాన్నీ గ్రహించలేక పోతున్నారట. అలాకాకుండా- చిన్నప్పటి నుంచీ ముద్రించిన పుస్తకాలకే పరిమితమైన వాళ్ళు ఎంత పెద్ద సమాచారాన్నయినా ఇట్టే అర్థంచేసుకోగలుగు తున్నారట.