ఉప్పునీటితో ‘వెలుగులు’

లవణ జల లాంతరుకు రూపకల్పన

ఈనాడు, దిల్లీ: సముద్ర ఉప్పునీటితో వెలిగే తొలి లాంతరును కేంద్ర శాస్త్ర, సాంకేతిక వ్యవహారాల మంత్రి జితేంద్రసింగ్‌ శనివారం విడుదల చేశారు. ఇందులో నింపే సముద్రనీరే ప్రత్యేకంగా రూపొందించిన ఎలెక్ట్రోడ్స్‌ మధ్య ఎలెక్ట్రోలైట్‌గా పనిచేసి ఎల్‌ఈడీ బల్బులను వెలిగిస్తుంది. తొలిసారి రూపొందించిన ఈ లాంతరుకు రోషిణి అని నామకరణం చేసినట్లు మంత్రి వెల్లడించారు. నేషనల్‌ ఇన్‌స్టిట్యూట్‌ ఆఫ్‌ ఓషియన్‌ టెక్నాలజీ సంస్థ నిర్వహిస్తున్న తీరప్రాంత పరిశోధన నౌక సాగర్‌ అన్వేషికను సందర్శించిన సందర్భంగా ఆయన ఈ లాంతరును విడుదల చేశారు. దేశంలోని సముద్రతీరంలో నివసించే మత్స్యకారులు, ఇతర పేదల జీవితాల్లో ఈ లాంతరు వెలుగులు నింపి వారి జీవితాన్ని మరింత సులభతరం చేస్తుందని కేంద్రమంత్రి పేర్కొన్నారు. దేశవ్యాప్తంగా ఉన్న పేదలకు ఎల్‌ఈడీ బల్బులు పంపిణీచేయడానికి 2015లో ప్రధాని నరేంద్రమోదీ ప్రవేశపెట్టిన ఉజాలా స్కీంకి ఈ లవణ జల లాంతరు మరింత ఊతమిస్తుందని తెలిపారు. ఈ సాంకేతికతను దేశంలో సముద్ర జలాలు లభ్యంకాని ప్రాంతాల్లోనూ ఉపయోగించవచ్చని పేర్కొన్నారు. సాధారణ ఉప్పు కలిపిన నీటిని కూడా వాడి ఇందులోని ఎల్‌ఈడీ దీపాలను వెలిగించవచ్చని, ఇది చాలా చౌకగా అందుబాటులోకి వస్తుందని చెప్పారు. ఈ సాంకేతికతను పరిశ్రమకు బదిలీచేయాలని ఆయన నేషనల్‌ ఇన్‌స్టిట్యూట్‌ ఆఫ్‌ ఓషియన్‌ టెక్నాలజీని కోరారు. దానివల్ల ఇలాంటి లాంతర్లను పెద్దఎత్తున ఉత్పత్తిచేసి పేదలకు పంపిణీచేయడానికి వీలవుతుందని అభిప్రాయపడ్డారు. ఇది ప్రకృతివైపరీత్యాల సమయంలో గ్రామీణ ప్రాంతాలకు బాగా ఉపయోగపడుతుందని తెలిపారు.