మెప్పించిన ఐఓబీ

దిల్లీ: ఈ ఆర్థిక సంవత్సరం డిసెంబరు త్రైమాసికంలో ప్రభుత్వ రంగ ఇండియన్‌ ఓవర్‌సీస్‌ బ్యాంక్‌ (ఐఓబీ) రూ.212.87 కోట్ల నికర లాభాన్ని నమోదు చేసింది. క్రితం ఆర్థిక సంవత్సరం ఇదే సమయంలో బ్యాంక్‌ రూ.6,075.49 కోట్ల నికర నష్టాన్ని ప్రకటించడం గమనార్హం. సెప్టెంబరు త్రైమాసికంలో బ్యాంక్‌ రూ.148.14 కోట్ల నికర లాభాన్ని ఆర్జించింది. సమీక్షా త్రైమాసికంలో మొండి బకాయిలు, కేటాయింపులు తగ్గడంతో నికర లాభం పెరిగిందని బ్యాంక్‌ ఎక్స్ఛేంజీలకు సమాచారమిచ్చింది. మొత్తం ఆదాయం కూడా రూ.5,197.94 కోట్ల నుంచి రూ.5,786.51 కోట్లకు చేరింది. స్థూల నిరర్థక ఆస్తులు (ఎన్‌పీఏలు) 17.12 శాతం (రూ.23,773.86 కోట్ల) నుంచి 12.19 శాతానికి (రూ.16,753.48 కోట్లకు) దిగొచ్చాయి. నికర ఎన్‌పీఏలు కూడా 5.81 శాతం (రూ.7,087.09 కోట్లు) నుంచి 3.13 శాతానికి (రూ.3,904.92 కోట్లు) పరిమితమయ్యాయి. మొండి బకాయిలు, ఆకస్మిక నిధికి కేటాయింపులు రూ.6,663.94 కోట్ల నుంచి రూ.1,513.57 కోట్లకు తగ్గాయి.