Bank frauds: ₹60 వేల కోట్ల నుంచి ₹600 కోట్లకు తగ్గిన బ్యాంకు మోసాలు!

లోక్‌సభలో వెల్లడించిన కేంద్రం

దిల్లీ: గత ఐదేళ్లలో బ్యాంకు మోసాలు గణనీయంగా తగ్గాయని కేంద్ర ఆర్థికశాఖ సహాయ మంత్రి భగవత్‌ కరాడ్‌ తెలిపారు. 2021-22 ఆర్థిక సంవత్సరం తొలి 9 నెలల వ్యవధిలో రూ.648 కోట్ల మోసాలు మాత్రమే నమోదైనట్లు వివరించారు. లోక్‌సభలో సభ్యులు అడిగిన ఓ ప్రశ్నకు సమాధానం ఇస్తూ సోమవారం ఆయన ఈ విషయం వెల్లడించారు.

కేంద్రం తీసుకున్న నిర్మాణాత్మక చర్యల వల్లే మోసాలు తగ్గాయని మంత్రి తెలిపారు. 2016-17లో రూ.61,229 కోట్ల విలువ చేసే బ్యాంకు మోసాలు నమోదైనట్లు వెల్లడించారు. అవి 2020-21 నాటికి రూ.11,583 కోట్లు, 2021-22 నాటికి రూ.648 కోట్లకు తగ్గినట్లు వివరించారు. బ్యాంకు మోసాలపై అవగాహన కల్పిస్తూ రిజర్వ్‌ బ్యాంక్‌ ఆఫ్‌ ఇండియా 2016లో విస్తృత మార్గదర్శకాలు జారీ చేసిందని గుర్తుచేశారు.