Bill Gates: భారత్‌లోకి ‘బిల్‌గేట్స్‌ కంపెనీ’.. హెడ్‌ ఆఫీస్‌ ఎక్కడంటే..?

బెంగళూరు: ప్రపంచ అగ్రగామి కుబేరుల్లో ఒకరైన బిల్‌గేట్స్‌తో పాటు తయారీ దిగ్గజం హానీవెల్‌ మద్దతు ఉన్న డిజిటల్‌ తయారీ కంపెనీ ఫిక్టివ్‌ భారత్‌లోకి అడుగుపెట్టింది. బెంగళూరులో ప్రాంతీయ ప్రధాన కార్యాలయాన్ని ఏర్పాటు చేస్తున్నట్లు మంగళవారం ప్రకటించింది. పుణెలో ప్రాథమికంగా అడుగుపెట్టి.. వినియోగదార్ల నుంచి సానుకూల స్పందన అందుకున్న అనంతరం.. ఇపుడు అధికారికంగా భారత్‌లో పెట్టుబడులు పెడుతున్నట్లు తెలిపింది.

ఇప్పటికే అమెరికా, చైనాల్లో విజయవంతంగా కార్యకలాపాలు నిర్వహిస్తున్న ఈ కంపెనీ భారత్‌ను మూడో తయారీ కేంద్రంగా ప్రకటించింది. ‘పరిశోధన- అభివృద్ధి, తయారీ నైపుణ్యం, సరఫరా వ్యవస్థలకు భారత్‌ కేంద్రంగా మారుతోంద’ని ఈ సందర్భంగా ఫిక్టివ్‌ సహ వ్యవస్థాపకుడు, సీఈఓ దేవ్‌ ఎవాన్స్‌ పేర్కొన్నారు. భారత్‌లో కార్యకలాపాల బాధ్యత నిమిత్తం జనరల్‌ మేనేజర్‌గా ఉదయ్‌ షెనాయ్‌ని కంపెనీ నియమించింది. బిల్‌గేట్స్‌, హానీవెల్‌, ఇంటెల్‌ క్యాపిటల్‌ నుంచి మొత్తం 192 మి. డాలర్ల(దాదాపు రూ.1575 కోట్లు) పెట్టుబడులు వచ్చినట్లు ఫిక్టివ్‌ తెలిపింది.