మదర్‌ స్పర్శ్‌లో ఐటీసీకి 16% వాటా

దిల్లీ: ఆయుర్వేదిక్‌, సహజసిద్ధ వ్యక్తిగత సంరక్షణ ఉత్పత్తుల బ్రాండ్‌ అయిన మదర్‌ స్పర్శ్‌లో 16 శాతం వాటా కొనుగోలు చేస్తున్నట్లు ఐటీసీ శుక్రవారం వెల్లడించింది. ఇందుకోసం రూ.20 కోట్లతో షేరు సబ్‌స్క్రిప్షన్‌ ఒప్పందం చేసుకుంది. వేగంగా వృద్ధి చెందుతున్న డైరెక్ట్‌ టు కన్జూమర్‌ (డీ2సీ) విభాగంలో ప్రవేశించేందుకు ఈ వాటా కొనుగోలు చేసినట్లు ఐటీసీ ఎక్స్ఛేంజీలకు సమాచారమిచ్చింది. మదర్‌ స్పర్శ్‌ ప్రీమియం ఆయుర్వేదిక్‌, సహజ సిద్ధ వ్యక్తిగత సంరక్షణ ఉత్పత్తుల అంకుర సంస్థ. తల్లీ బిడ్డ సంరక్షణ విభాగంపై ఈ సంస్థ ప్రధానంగా దృష్టి సారిస్తోంది. 2016 ఫిబ్రవరి 5న ఈ కంపెనీ ప్రారంభమైంది. 2020-21లో రూ.15.44 కోట్ల టర్నోవర్‌ సాధించింది.