Oneplus: వన్‌ప్లస్‌ యూజర్స్‌కు రిలీఫ్‌.. వారికి లైఫ్‌టైమ్‌ స్క్రీన్‌ వారెంటీ!

ఇంటర్నెట్ డెస్క్: ఇటీవల వన్‌ప్లస్‌ (Oneplus) యూజర్ల నోట వినిపిస్తున్న ప్రధాన సమస్య గ్రీన్‌లైన్‌ (greenline isssue). తమ హ్యాండ్‌సెట్‌ను లేటెస్ట్‌ వెర్షన్‌కు అప్‌డేట్‌ చేసిన తర్వాత స్క్రీన్‌పై ఆకుపచ్చ రంగులో ఓ గీత దర్శనమిస్తోందని పలు యూజర్లు ఫిర్యాదు చేస్తున్నారు. పాత వెర్షన్‌కు మారినా ఈ సమస్య పోవడం లేదని చెబుతున్నారు. దీనిపై ట్విటర్‌, రెడిట్‌, వన్‌ప్లస్‌ కమ్యూనిటీ వంటి వేదికలుగా తమ సమస్యను తెలియజేస్తున్నారు. ఈ నేపథ్యంలో ఆయా యూజర్లకు ఊరట కల్పిస్తూ వన్‌ప్లస్‌ సంస్థ కీలక నిర్ణయం తీసుకుంది. భారత్‌లో ఈ సమస్య ఎదుర్కొంటున్న యూజర్లకు లైఫ్‌టైమ్‌ స్క్రీన్‌ వారెంటీ సదుపాయాన్ని కల్పిస్తోంది.

ముఖ్యంగా వన్‌ప్లస్‌ 8, వన్‌ప్లస్‌ 9 సిరీస్‌ ఫోన్లలో ఈ గ్రీన్‌లైన్‌ ఇష్యూ ఎక్కువగా కనిపిస్తోంది. వన్‌ప్లస్‌ ఓఎస్‌ అయిన ఆక్సిజన్‌ 13.1 అప్‌డేట్ చేసినప్పుడు తమ ఓఎల్‌ఈడీ డిస్‌ప్లేలో గ్రీన్‌లైన్‌ కనిపిస్తున్నట్లు కంపెనీ దృష్టికి తీసుకురావడంతో వన్‌ప్లస్‌ ఈ నిర్ణయం తీసుకుంది. ఈ సమస్య ఎదుర్కొన్న వారు దగ్గర్లోని వన్‌ప్లస్‌ సర్వీసస్‌ సెంటర్‌కు వెళితే ఉచితంగా స్క్రీన్‌ రీప్లేస్‌ చేసి ఇస్తామని కంపెనీ ఓ ప్రకటనలో పేర్కొన్నట్లు ఆండ్రాయిడ్‌ అథారిటీ పేర్కొంది. యూజర్లకు కలిగిన అసౌకర్యానికి చింతిస్తున్నామని వన్‌ప్లస్‌ పేర్కొంది. ఇండియాలో కొనుగోలు చేసిన వన్‌ప్లస్‌ హ్యాండ్‌సెట్లకు ఈ సర్వీస్‌ వర్తిస్తుంది.

జియో ఫ్రీడమ్‌ ప్లాన్‌.. ₹2,999 రీఛార్జిపై ₹5,800 విలువ చేసే ప్రయోజనాలు

అయితే, స్క్రీన్‌ రీప్లేస్‌మెంట్‌తో పాటు వోచర్‌ సదుపాయాన్నీ వన్‌ప్లస్‌ కల్పిస్తోంది. పాత ఫోన్‌ తీసుకుని కొత్త వన్‌ప్లస్‌ డివైజ్‌ కొనుగోలుకు వోచర్‌ అందిస్తోంది. పాత ఫోన్‌కు తగిన విలువ కట్టి ఈ వోచర్‌ను అందిస్తోంది. ముఖ్యంగా వన్‌ప్లస్‌ 8 ప్రో, వన్‌ప్లస్‌ 8టి, వన్‌ప్లస్‌ 9, వన్‌ప్లస్‌ 9ఆర్‌ మోడళ్లపై డిస్కౌంట్‌ వోచర్లను వన్‌ప్లస్‌ అందిస్తున్నట్లు తెలుస్తోంది. స్పేర్‌ పార్ట్స్‌ అందుబాటులో లేని కారణంగా చాలా స్టోర్ల వద్ద వోచర్‌ను అందిస్తామని నోటీసులు అతికిస్తున్నారు. ఏ మోడల్‌ ఫోన్‌కు ఎంత విలువ కలిగిన వోచర్‌ అందిస్తారో, ఏయే ఫోన్లపై డిస్కౌంట్‌ లభిస్తుందో వంటి వివరాలను అందులో పొందుపరుస్తున్నారు. ఒక్క వన్‌ప్లస్‌లోనే కాదని, ఇతర కంపెనీ ఫోన్లలోనూ కొన్నింటిలో ఈ సమస్య తలెత్తుతున్నట్లు యూజర్లు ఫిర్యాదు చేస్తున్నారు.