DPI model: భారత్‌ను చూసి నేర్చుకోవచ్చు : గేట్స్‌ ఫౌండేషన్‌ చీఫ్‌

దావోస్‌: వివిధ రంగాల్లో భారత్‌ సాధిస్తోన్న పురోగతి, అమలు చేస్తున్న డిజిటల్‌ విధానాలపై బిల్‌ అండ్‌ మిలిందా గేట్స్‌ ఫౌండేషన్‌ (Gates Foundation) ప్రశంసలు గుప్పించింది. ఆరోగ్య సంరక్షణతో పాటు ఇతర అభివృద్ధి లక్ష్యాలను సాధించడంలో భారత్‌ విజయవంతంగా అమలుచేస్తున్న డిజిటల్‌ పబ్లిక్‌ ఇన్‌ఫ్రాస్ట్రక్చర్‌ మోడల్‌ను (DPI Model) యావత్‌ ప్రపంచం వినియోగించుకోవచ్చని తెలిపింది. వరల్డ్‌ ఎకనామిక్‌ ఫోరమ్‌ (WEF) వార్షిక సదస్సులో భాగంగా పీటీఐకి ఇచ్చిన ఇంటర్వ్యూలో గేట్స్‌ ఫౌండేషన్‌ అధ్యక్షుడు క్రిస్టోఫర్‌ జే ఇలియాస్  మాట్లాడారు.

‘భారత్‌లో ఆరోగ్యం, వ్యవసాయం, నీరు, పారిశుద్ధ్యం, డిజిటల్‌ పబ్లిక్‌ ఇన్‌ఫ్రాస్ట్రక్చర్‌, సమ్మిళిత ఆర్థిక సేవలు సహా అనేక రంగాల్లో బిల్‌ అండ్‌ మిలిందా గేట్స్‌ ఫౌండేషన్‌ పనిచేస్తోంది. కేంద్రంతో పాటు వివిధ రాష్ట్రాలతో కలిసి పని చేస్తున్నాం. 20 ఏళ్ల క్రితమే కార్యాలయాన్ని నెలకొల్పాం. మా సేవలను మున్ముందు కొనసాగిస్తాం. ముఖ్యంగా ఆర్థిక సేవలు, ఆరోగ్యం వంటి రంగాల్లో భారత్‌ ఎంతో పురోగతి సాధించడానికి డిజిటల్‌ పబ్లిక్‌ ఇన్‌ఫ్రాస్ట్రక్చర్‌  విధానం ఎంతగానో దోహదపడింది. ప్రపంచం అనుకరించడానికి ఇదో మంచి విధానం అని భావిస్తున్నా’ అని క్రిస్టోఫర్‌ పేర్కొన్నారు.

TCS కీలక నిర్ణయం.. 5 లక్షల మంది సాఫ్ట్‌వేర్‌ ఇంజినీర్లకు జెన్‌ ఏఐలో శిక్షణ

గత దశాబ్దకాలంగా వేగంగా పురోగతి సాధించడంతో పాటు దేశాభివృద్ధిలో యూనివర్సల్‌ ఐడీ, యూనివర్సల్‌ పేమెంట్‌ ఇంటర్‌ఫేస్‌ వంటివి ఎంతగానో దోహదం చేశాయని గేట్స్‌ ఫౌండేషన్‌ చీఫ్‌ పేర్కొన్నారు. అంతర్జాతీయ అభివృద్ధి లక్ష్యాలను వేగవంతం చేయడంలో కృత్రిమ మేధ దోహదపడుతుందన్నారు. కానీ, దాన్ని బాధ్యతాయుతంగా, నైతిక విలువలు, నియంత్రణలతో జాగ్రత్తగా ఉపయోగించుకోవాల్సిన అవసరం ఉందన్నారు.