Smuggling: రూ.2000 కోసం.. 2 కేజీల బంగారం సరిహద్దులు దాటించి..!

(ప్రతీకాత్మక చిత్రం)

కోల్‌కతా: బంగ్లాదేశ్‌ (Bangladesh ) నుంచి భారత్‌కు బంగారం అక్రమ రవాణా చేస్తూ ఓ మహిళ పట్టుబడింది. రెండు కేజీల బరువున్న 27 బంగారు కడ్డీలు(Gold Bars)తరలిస్తూ సరిహద్దు భద్రతా దళాని(BSF)కి చిక్కింది. రూ. రెండు వేల కోసం దాదాపు రూ.1.29 కోట్ల ఆ మొత్తాన్ని సరిహద్దులు దాటించేందుకు యత్నించింది. 

అక్రమ రవాణాకు పాల్పడిన ఆ మహిళ బంగ్లాదేశ్‌లోని చిట్టగాంగ్‌కు చెందిన వ్యక్తి. దుస్తుల్లో బంగారు కడ్డీలను ఉంచి వాటిని నడుము చుట్టూ కట్టుకొని బంగ్లాదేశ్‌ నుంచి భారత్‌కు చేరుకుంది. ఈ క్రమంలో బంగారం తీసుకొని ఒక స్మగ్లర్ సరిహద్దులు దాటారని బీఎస్‌ఎఫ్ సిబ్బందికి సమాచారం అందింది. వెంటనే మహిళా సిబ్బంది పశ్చిమ బెంగాల్‌(West Bengal)లోని 24 పరగణాల జిల్లాలో ఆమెను అరెస్టు చేశారు. తనిఖీలు చేయగా.. ఆమె వద్ద బంగారాన్ని గుర్తించారు. బెంగాల్‌లోని బరాసత్ ప్రాంతంలో ఓ గుర్తుతెలియని వ్యక్తికి ఈ బంగారం అందించాలని తనకు ఆదేశాలు ఇచ్చినట్లు.. రూ.2వేల కోసం మొదటిసారి ఈ పనిలోకి దిగినట్లు విచారణలో సదరు మహిళ వెల్లడించింది. ప్రస్తుతం ఈ బంగారాన్ని కస్టమ్ అధికారులకు అప్పగించారు.