Telangana news: సిద్దిపేట కాల్పుల ఘటన.. పోలీసుల చేతికి కీలక ఆధారాలు..

సిద్దిపేట: సిద్దిపేట సబ్‌రిజిస్ట్రార్ కార్యాలయంలో పట్టపగలే తుపాకీతో కాల్పులు జరిపి రూ.43.50లక్షలు దోచుకెళ్లిన ఘటనలో పోలీసులకు కీలక ఆధారాలు లభించాయి. సిద్దిపేట పోలీస్ కమిషనర్ శ్వేత ఆధ్వర్యంలో ఐదు ప్రత్యేక బృందాలు దర్యాప్తు ప్రారంభించాయి. వీరికి అదనంగా మరో 15 బృందాలు జిల్లావ్యాప్తంగా తనిఖీలు నిర్వహిస్తున్నాయి. దాడికి ఉపయోగించిన తుపాకీ కారులోనే డోరుకు, సీటుకు మధ్య ఉన్నట్లు పోలీసులు గుర్తించారు. తుపాకీ స్థానికంగా తయారు చేసిన అక్రమ ఆయుధమని తెలుస్తోంది. పోలీస్ కమిషనర్ కార్యాలయంలోని కమాండ్ కంట్రోల్ ద్వారా దర్యాప్తు బృందాలకు కమిషనర్ శ్వేత దిశానిర్దేశం చేస్తున్నారు. చరవాణి సిగ్నళ్ల తో పాటు సీసీ కెమెరాల దృశ్యాలను పరిశీలించారు. వీటి ఆధారంగా దుండగులు రాజీవ్ రహదారి గుండా హైదరాబాద్ వైపు వెళ్లినట్లు గుర్తించారు. దుండగులకు సంబంధించి కీలక సమాచారం రాబట్టిన పోలీసులు.. ఈ రోజు వారిని అదుపులోకి తీసుకునే అవకాశం ఉంది.